| 曾經自稱是陳志雲Honey的鄧健泓（Patrick）與無綫小花龔嘉欣早前宣布分手，期間曾傳出港男許家傑是第三者，但原來別有內情！有指Patrick拍攝劇集《飛虎》時已跟有「豬扒港姐」之稱的張嘉兒秘密搭上，公司同事看不過眼，都曾勸龔嘉欣忍痛放手。鄧健泓（Patrick）、龔嘉欣早前宣布兩年多戀情玩完，傳前香港先生許家傑是第三者後，嘉欣邊哭邊否認，還強調未能放下舊情。不過，據二人身邊好友透露，鄧龔分手原因乃Patrick在拍攝無綫劇集《飛虎》期間秘嗒張嘉兒，除經常任對方「柴可夫」管接管送外，就算男方收工後仍會等嘉兒一同離開，盡顯冧功，令旁人為之側目，就連嘉欣的圈中朋友收到風後也紛紛勸嘉欣斬纜；亦有居於將軍澳的同事曾見Patrick與嘉兒於女方寓所齊齊搭升降機上樓，加上嘉兒亦已跟外籍男友分手，令戀情更公開化。「同車關係」曝光 記者昨日致電Partick，他直認剛剛與嘉兒於車上被拍，問是否齊齊返家？他謂：「總之喺車，其他我唔想多講。（你係咪同嘉兒拍緊拖？）唔會呀嘛！乜嘢人講o架？我同佢係朋友，以前同依家都係。我依家單身，唔知點解男、女正常交往咁麻煩囉！（發展機會？）我點講都係死，實會牽連到一啲關係，分開嘅實有第三者，好似之前許家傑咁！」 不過，Patrick明顯相當維護嘉兒，除怕為女方帶來傷害，並大讚嘉兒謂：「我認識嘅張嘉兒係美貌與智慧並重，佢點會做第三者！我都38歲，對每段感情都好認真，都唔想每次都發生咁多問題。」之前他與原子鏸、李詩韻、龔嘉欣拍拖都沒有好收場，問他是否以後也不跟圈中人拍拖？他有保留地說：「我唔想交代太多，我同嘉兒係朋友，總之佢一定唔係第三者。」他又再三否認許家傑是第三者。其實早於2010年，Patrick曾上載與嘉兒密照，更有童鞋離奇地祝福二人戀情。 至於嘉兒昨在電話中同樣斬釘截鐵否認是第三者，但承認經常坐男藝人順風車：「我坐Patrick車係疏忽，佢同Katy分開咗係好敏感，呢件事對我好唔公平，希望Katy唔好誤會，（同佢解釋？）有機會都會。」她又坦言不覺Patrick有追求之意：「通常男仔直接叫我做佢女友先會覺得佢追我，（你哋有冇發展機會？）咁我又唔知！但我唔會做第三者囉！」 | 
