| 世界未末日古巨基即來個企硬缺席即將舉行的四台頒獎禮，去年基仔已指頒獎禮意義變質已萌起「唔玩」念頭，今年新碟叫好叫座，更有望五連冠奪無綫「最受歡迎男歌星」獎，但基仔不甘受商台打壓，懶理英皇反對，堅持「放假唔要獎」。上年基仔已向英皇要求不參加四台頒獎禮，因基仔有感近年頒獎禮的意義經變質，但要求卻遭公司反對。加上有傳今年商台高層甘菁菁為了讓陳奕迅（Eason）奪「叱咤男歌手」男歌手金獎，而打壓基仔的歌曲播放率，導致基仔意興闌珊不想再參加所謂的音樂頒獎禮。 基仔「缺席」其實早有先兆，近日基仔每次出席公開活動被問到會否出席四台頒獎禮時，都未有表態，基仔還借「世界末日」論擋駕，笑言過了「末日」才會揭盅。據悉年初時基仔再次向公司提出2013年不出席頒獎禮，但當時公司未有正面答覆基仔，到年中時，基仔私底下已安排自己明年1月1日開始放大假。 太辛苦想放假然而英皇則見基仔今年無論新歌《戀無可戀》和唱片《告別我的戀人們》口碑及銷量俱佳，一直好有信心為基仔在各大頒獎禮爭取好成績，甚至第五度冧莊奪無綫「最受歡迎男歌星獎」及「金曲金獎」。就連英皇行政總裁吳雨，都認為今年公司上下為基仔音樂上做出佳績，基仔理應出席頒獎禮，但基仔決意離港「放假」，令吳雨進退兩難大為頭痛。昨日記者聯絡吳雨，他承認基仔有向他說要放假：「公司立場梗係想佢出席，但就算佢唔去，大家都認同佢今年嘅成績。（因為商台打壓？）傳聞嚟啫，基仔係辛苦先想放假。」可擔心影響與無綫關係？吳雨謂：「歌手唔出席冇影響嘅，規矩個個台都有，基仔唔去咪分啲畀人囉，有能者居之。」 公司落力爭取對於基仔要放大假不出席頒獎禮，求證經理人霍汶希（Mani），她表示：「佢係有咁嘅想法，但我哋當然唔想，因為基仔今年喺各台成績都好好，同事及宣傳部都好落力，我哋都想佢出席，始終佢係我哋公司嘅中流砥柱嚟。（基仔唔出席怕唔怕影響與無綫及其他三台關係？）唔會影響關係，但就會影響獎項嘅數目，因有啲台唔出席就會冇獎。」盛傳商台打壓基仔問題，令英皇都支持基仔今次決定？Mani謂：「我諗呢啲係傳聞嚟啫！我哋最重要係尊重歌手嘅決定，之前基仔同我哋講過如果冇末日就好想同屋企人出外旅行，因為多年嚟冇試過節日陪家人出去玩，所以，我哋會尊重佢意願，但另一方面我哋都會盡最後努力，希望基仔出席頒獎禮。」 | 
