農曆正月大年一過，另一個重要節日就係今日元宵節喇。提到元宵節，當然唔少得食“元宵”慶團圓。元宵節嘅傳統各地有別，北方主要食元宵，南方就食湯圓為多。雖然兩樣食物睇落都係圓碌碌好似冇乜分別，其實做法上明顯有唔同。北方製作元宵主要以餡料為基礎，先拌餡料，稍為晾乾之後再切塊搓圓，放喺糯米粉上面一“滾”，黐層糯米薄膜就大功吿成。南方湯圓就先做皮再入餡，皮同餡料嘅水分都會多啲，口感更加軟滑。煮法都各有特色：我哋廣東地區興用糖水煮湯圓，東北同江南地區就喜歡用酒糟做湯，有啲地區就鍾意食蒸、炸或者炒元宵，餡料變化層出不窮，各有風味。 元宵節仲有一個重要意義，就係中國傳統意義嘅情人節。舊時唔似現代咁開放，年輕女仔想出街通常要到元宵節呢日先可以破戒。喺呢一日旣可以賞花燈猜燈謎，又可以逛廟會食點心，仲有機會遇上有情人，成就一段美滿姻緣。聽聞古時候情侶仲會喺元宵節呢日去廟宇求姻緣籤口添。 講開又講，宜家後生仔逢親情人節又買朱古力又送花送禮物，認眞花臣多多。老周我一把年紀就冇能力再耍花招，唯有乖乖喺屋企煮湯圓同幾味靚餸來慰勞賢妻大人，過返我哋自成一派嘅“浪慢”！ | 
