|
- UID
- 7
- 帖子
- 9366
- 主題
- 8228
- 精華
- 0
- 積分
- 22795
- 金錢
- 245259
- 閱讀權限
- 150
- 在線時間
- 2647 小時
- 註冊時間
- 2011-3-10
- 最後登錄
- 2020-4-17
            
|
大台生日有客到，賓客留步請上前，藍白直幡、滿天溪錢，巿民冤情無路訴。一個月內再度發動全城熄電視，以紅色按鈕一鞠躬、再鞠躬，告別一台獨大、黑箱發牌馬騮戲，包括無綫員工在內無數網民響應。逾200名巿民不值阿叻跪返屋企的狂言，直闖電視城外為無綫46周年台慶「做生忌」，送上輓聯「今日新牌歸故土、他朝霸權也相同」，向電視霸權「say no」。
記者：張嘉雯 韓耀庭 吳嘉羚 黃曉妍
在網民呼籲「萬千熄機賀台慶」的晚上，高牆內專制國度繼續阿里郎式歌舞昇平。在白色「名車」開進錄影廠時、在所謂獎門人第18年唱「畀獎金，數百萬當係碎銀」時、在主持人與觀眾電話高呼「Happy Birthday」時，逾200名巿民響應網上號召，傍晚時分陸續到無綫將軍澳電視城外踩場，有人夾錢乘的士、有人租旅遊巴，落足心機炮製精警標語，抗議政府在免費電視發牌上黑箱作業令無綫一台獨大。
「唔好以為唔睇你唔得」
從事清潔工作的梁先生，昨晚拒絕加班要求，近6時已在電視城對出行人路掛標語。他表示，電視發牌事件令他對政府極度失望，過往曾多次為普選上街，惟有再上街頭，「做咗未必有用，唔做一定冇用，好似23條咁，我哋出咗嚟，都影響到議員轉軚吖，我知道搵食好緊要，但都唔該你公道啲，唔好以為香港人唔睇你唔得！」
失業的劉先生昨晚由將軍澳地鐵站徒步個多小時，前往電視城示威，手舉「TVB霸佔大氣電波、公器私用」的標語。他直言現時以免費電視為最大娛樂，「但𠵱家得一個台，質素又越嚟越低，完全唔真實。」
■網民租用吊臂車升起輓聯，諷刺無綫已死。朱永倫攝
■社民連梁國雄以斷腳踏CCTVB的道具上，抗議TVB一台獨大。
舉牌成名的「事旦男」批評無綫新聞內容自我審查，又指《東張西望》早前「報道」碼頭工潮時內容偏頗，侮辱碼頭工人；有巿民則呼籲杯葛在無綫賣廣告的產品。
電視城內藝人恍如盛裝出席聯歡會的聖誕老人，每見鏡頭即時咧嘴而笑兼落力拍掌，電視城外數百巿民大喊「TVB，收皮！電視霸權，中斷！」「我有權睇免費電視」、「還我遙控器」等。公然向網民挑機的陳百祥成為眾矢之的，被大罵「阿叻、阿叻，擦鞋最叻」，除了有巿民升起巨型「奠」氣球外，亦有大型吊臂車升起四米藍白直幡，寫上「今日新牌歸故土、他朝霸權也相同」，向站在高牆內、賀46周年舞台上的藝員表達訊息。
學生哥阿Ken與友人John則帶來溪錢兩叠分派，要送大台上路，阿Ken批評陳百祥「好有問題」，「做人唔係咁，一台獨大就恃勢凌人，有心嘅又唔畀佢試吓。」
多年沒看電視的的士司機羅先生，最不滿政府黑箱作業，他說：「個政府咁，個制度咁畸形，恰我哋吹佢唔脹、奈佢唔何，我真係唔知仲可以點，唔知可以做啲乜嘢懲罰佢哋，惟有約埋啲朋友一齊過嚟表吓態，行出嚟表達不滿。」
無綫大老闆、「殼王」陳國強，以及集團總經理李寶安與六嬸方逸華等人，昨出席完台慶酒會後，再入錄影廠欣賞節目。被問到有網民「包圍」電視城示威一事，李寶安答非所問說：「今晚台慶節目就非常好睇啦，好多獎品，所以冇乜問題。」
梁乃鵬：我有我哋慶祝
無綫行政主席梁乃鵬昨晚在台上祝酒後，被問到在電視城門外有示威一事，梁乃鵬說：「我知道，有社民連同人民力量兩個政黨申請示威，我唔覺得掃興，我哋46 周年，live兩個半小時，一分鐘都冇冷場，係好好嘅演出，由頭到尾都一氣呵成。我好多謝台前幕後啲藝員同事，呢啲唔緊要，佢有佢嘅示威，我有我哋慶祝，喜氣洋洋囉！冇受絲毫影響。」梁乃鵬亦否認有廣告商抽起廣告。 |
|
