趙碩之戰鬥格

相隔三年將於七月再出寫真的趙碩之（Wylie）心態轉變了不少，以前她只知道出寫真集，拍得靚便可，沒有甚麼出位招數，但今日的她卻一副戰鬥格，銳意成為充滿女人味的女神。其首要改變是受訪時不再衝口而出，對答要有紋有路，她說：「依家心態成熟咗！特別喺講嘢方面，以前諗嘢好直接，有好多負面新聞都係因為溝通上嘅誤解。」選擇今年出寫真，除想以內衣展現女性胴體美外，亦希望為自己做個記錄：「其實我每一年都轉變緊，無論外形、性格定係經歷，本來係一個o靚模，依家變咗做『女性』。」

感激身邊人

Wylie坦言首本寫真賣個滿堂紅令她很驚喜，今年再出寫真，她不敢給自己太大壓力：「以前影寫真覺得好好玩，只會抱住玩嘅心態，今年感激嘅心多咗好多，知道身邊好多人幫緊我，要以一個專業模特兒嘅心態去影相，如果唔係就對唔住個攝影師！」她亦有留意今年會出寫真的o靚模，但表示不會作比較：「出寫真除咗想突破自己，最緊要記錄到我，依家同公司都開始有新人，自己有種『師姐仔』嘅心態，會喺佢哋身上睇到以前嘅自己！」

o靚模界經常爭「峰」頭出位，即使同門也免不了競爭，Wylie直言入行以來的低潮莫過於跟師妹尹蓁晞（Yumi）之間的誤會，過往她曾與Yumi因小事互寸：「以前同Yumi有時會畀人誤會，好大壓力，只不過係講嘢直啲！呢個性格嘅人最憎畀人屈，依家同Yumi都會傾多咗好多呢啲嘢！」現在的她學懂體諒昔日宿敵：「Yumi其實係一個好好嘅女仔，只係唔知工作上要咩，我以前未了解佢，唔識體諒佢，佢心態好好，只係太着重愛情。」她開心地說無論跟Yumi抑或做了她經理人的戴夢夢都會打開心窗說亮話，不再避忌。

短髮真性情

不少「性感女神」都留長髮，Wylie反而覺得短髮更切合其性格：「畀人讚性感真係好開心，依家剪咗呢個頭，更加覺得騷在骨子裏！」除拍寫真外，她希望作多方面發展，她目前忙拍電視劇《親密損友》，雖然少了時間與家人相處，但感情卻增進不少，她說：「以前家姐見到有我嘅負面新聞，試過寫信畀我，依家屋企人心態變咗！會同我傾偈，我都會同佢哋講多咗工作上嘅嘢！」
後記：真正的蛻變
如Wylie所講，她的確蛻變了不少，面對記者的提問，不會再像以往般「開籠雀」，反而會諗深一層，避免溝通上出現誤會，而經常拍寫真的她，面對鏡頭能流暢地擺出不同甫士，展現蛻變的一面！

趙碩之出寫真希望記錄外形、性格及經歷上的轉變。

剪了一頭橙色男仔頭的趙碩之，正式由o靚模蛻變成「真女人」。

返回列表

趙碩之戰鬥格

[收藏此主題] [關注此主題的新回復]

[通過 QQ、MSN 分享給朋友]