【明報專訊】人民力量黃毓民（圖左）之前因為冇讀晒立法會誓辭而被判宣誓無效，為保議席，佢噚日獲批准宣誓多一次。毓民讀誓辭讀到「擁護中華人民共和國」時，以極輕聲讀個「人」字，讀「民」同「國」字就特別大聲，唔通暗示自己擁護「中華民國」？佢最後再加多句「打倒港共政權」，呢個表達方式就惹來建制派嘅謝偉俊不滿。
謝偉俊話，根據法庭2004年判決，《基本法》對立法會議員宣誓嘅要求非常嚴格，認為毓民嘅宣誓不情不願、欠缺誠意，有違《基本法》要求，但最終立法會主席曾鈺成裁定毓民嘅宣誓有效。
壓倒莫乃光當上資訊科技及廣播事務委員會主席嘅毓民心情大好，有人仲見到佢捉住該委員會副主席民建聯葛珮帆，拉埋對方喺一邊密斟。不過，喺議會大嗌梁振英講大話嘅社民連「長毛」梁國雄就心情極差，被曾鈺成以不停插嘴干擾為由再度趕出會議廳，佢話抗議一個「土共特首」態度傲慢係「應有之義」，批評曾鈺成搵佢開刀係「耍淫威」，佢仲激動地指住電子傳媒鏡頭話，一日曾鈺成唔交代佢係咪共產黨員，一日都冇公信力，「你哋（傳媒）如果唔播呢句出街，以後唔好訪問我！」 | 
