【阿叻再挑機】噚日話:無綫唔捐我捐 阿叻今日話:我幾時話我捐，係TVB捐
本帖最後由 東方不敗 於 2013-11-16 18:20 編輯
連日炮發表爆炸性言論、自認擦鞋護主嘅陳百祥，今日同太太黃杏秀、錢國偉同翁靜晶等人，出席蕭潮順製作公司喺觀塘開幕活動。
事前有傳今日活動王維基會現身，阿叻話：「都歡迎呀，佢(王維基)真係我老友，又係蕭潮順同學，佢第一日做唔做(電視台)既時候，已經話俾佢聽叫佢做定唔做。」追問當日俾咗咩意見？佢話：「你哋問番佢，當時有畀建議，我講唔好玩嘞，我哋一向有交流，我做Telecom電訊，原則上我都唔係做電視台。」不過最終都係唔見王維基嘅踪影。
阿叻大約逗留兩個鐘之後離開，再問佢係咪捐三百萬？佢話：「我幾時話我捐，係TVB捐，收視係TVB，台慶又唔係我一個做，既然嗰邊咁多負能量話熄機，我咪做正能量開機囉。」吓？明明噚日話無綫唔捐佢自己捐o架喎!
阿叻又話TVB好有錢，唔使佢包底，亦唔使老闆點頭，佢話：「無綫係上市公司冇老闆，管理層點頭就得，不過我無見過管理層，我諗佢哋唔敢唔應承啩？」假如最後冇人認頭呢？阿叻揚言：「冇人認頭點？叫佢喺我糧扣啦，我都係做廿個騷之嘛，一年做廿個騷唔太辛苦！」
對於被指淆底反口，阿叻寸嘴話：「我唔識字，網民個網係咪狂妄個妄，可能係小部份人作，叫佢哋唔好用唔正常方法，叫人整爛個盒，正氣『祥』存，我好難死，記住開電視睇順便做善事，越多人講多人注意，睇怕到40點，每多一點多十萬！」 |
