小花俠論壇 - Powered by Discuz! Board

標題: 林峯子珊勢開齋稱帝封后 [打印本頁]

作者: 王腳立 時間: 2012-10-14 15:26 標題: 林峯子珊勢開齋稱帝封后

年底又到無綫視帝視后爭崩頭的日子，小生花旦為挑戰電視城之巔而扭盡六壬！「超級親生仔」林峯雖然有黎耀祥和鄭嘉穎等視帝級猛人挑機，但據知無綫高層偏向屬意林峯登基；反觀視后競爭更為激烈，形成徐子珊、胡杏兒、楊怡、鍾嘉欣及米雪五角混戰！
每年無綫台慶視帝視后之爭都會掀起連場明爭暗鬥，雖然最佳男女主角名單下月才公布，但據知無綫內部已流傳最後五強名單，林峯將與黎耀祥、鄭嘉穎、馬國明和黃宗澤爭奪視帝寶座；而徐子珊、胡杏兒、楊怡、鍾嘉欣和米雪將成五角花旦混戰。

身為無綫頭號親生仔的林峯，連奪3年《勁歌》亞太區最受歡迎香港男歌星，攞獎攞到手軟，可惜其演技一直未能在自己地盤獲肯定，有鑑無綫今年仍未有一個人氣小生彈出，加上林峯師奶Fans多，在很大機會全民公投視帝下，登頂絕對睇高一線，而且他主演的劇集《雷霆掃毒》收視及口碑不俗，據知高層也屬意他稱帝！
杏兒楊怡有高層撐
不過，兩大視帝級猛人黎耀祥和鄭嘉穎，以及半冷的黃宗澤和馬國明隨時做攔路虎。祥仔主演的《大太監》被安排作今年台慶劇，仍未出街已吸引得「祥粉」牙癢癢，加上他往績佳，勢令林峯未能安枕！而嘉穎承接去年三料視帝餘威，今年望憑《怒火街頭2》冧莊，當然是熱門之一。至於黃宗澤在《護花危情》及馬國明在《On Call 36小時》中的演出亦備受讚賞，實力絕不能小覷！

相比林峯彈出，視后之爭則未能明朗化！據知《雷霆掃毒》的徐子珊、《怒火2》的胡杏兒、《On Call 36小時》的楊怡、《護花危情》的鍾嘉欣和《大太監》的米雪，競爭七國咁亂！雖然子珊在《雷》劇豁出去慘遭強姦，但杏兒和楊怡都甚得高層歡心，加上嘉欣喊到崩潰攞分，而視后級的米雪亦分量十足。據知，無綫對誰奪視后仍沒有頭緒，但子珊仍被睇高一線。
袋千萬酬勞驚追稅
另外，林峯、子珊及吳綺莉等昨日出席《雷》劇宣傳活動，正拍葉璇製作公司古裝劇的林峯專程從橫店返港，問到酬金是否十分可觀？他笑晒說：「差唔多啦！」其後自爆有8位數字，當記者指他收40萬元一集，他說：「唔好再講，稅局會追數！（夠買樓？）睇吓買幾大，3字頭係要儲老婆本！」而拍畢節目巡禮節目《神槍狙擊手2013》的子珊姍姍來遲，問到爭視后是否信心十足？她說：「仲有兩套大劇未出，未必係我啦！不過離台慶仲有一段時間，會爭取機會多做宣傳！」她表示正準備台慶戰衣，問到會否十分性感？她說：「性感冇問題，睇到時Fit唔Fit先！」
視帝5強
林峯《雷霆掃毒》贏面80％

鄭嘉穎《怒火街頭2》贏面70％

黎耀祥《大太監》贏面70％

黃宗澤《護花危情》贏面65％

馬國明《On Call 36小時》贏面50％
視后5強
徐子珊《雷霆掃毒》贏面80％

胡杏兒《怒火街頭2》贏面75％

楊怡《On Call 36小時》贏面70％

鍾嘉欣《護花危情》贏面70％

米雪《大太監》贏面50％