秋天到食鯉魚滋補
上星期提到秋風起、食臘味，雖然臘味飯眞係好香好好味，不過現在人人都話講究健康，點都會有老友嫌臘味肥膩唔想多食。咁不如等老周介紹下一款秋天滋補食物啦，要講嘅就係人人都識嘅鯉魚。
正所謂“春邊秋鯉夏三鯠”，秋天到，最好就係食鯉魚。可能會有後生仔問：“乜鯉魚唔係觀賞魚咩？可以食咩？”觀賞有觀賞的鯉魚，食有食的鯉魚，只不過觀賞用的鯉魚鋒頭太過厲害，加上現代人吃魚的選擇實在太多，又喜歡吃海魚為主，所以鯉魚就越來越少人食，會食嘅可能都係老一輩嘅人喇。
中國人認為鯉魚是補物，秋天食最好且能滋補養生，數最“上等”同出名的鯉魚梗係肇慶的墨溪鯉及文慶鯉。肇慶的鯉魚都係塘養，食馬蹄和茨實，肉質鮮甜，眞係點整都咁好味。其實要整鯉魚好簡單，薑葱炆鯉魚就最常見，先將魚煎香兩邊，加薑葱爆香再灒酒，然後加上湯，炆大約十五分鐘，等到差不多收乾水便熄火，用筷子試下，如果豛得入就為之熟啦。
現代人食魚選擇越來越多，又不知從何時開始覺得食淡水魚不夠體面，加上淡水魚又多骨，所以越來越少人食用。計我話淡水魚肉質鮮甜，價錢亦比海魚便宜，行過街市不妨多點留意吧！
（澳門美高梅金殿堂烹飪顧問）
|
|
