與吳彥祖結婚兩年的Lisa S.日前宣布造人成功，報喜後首次出席活動，並透露腹中BB是女兒，笑言老公擔心將來會與囡囡男友大打出手。與她同場的林嘉綺亦自爆佗BB女，希望女兒長大後與Lisa囡囡一起行騷！

香港名模Lisa S.、台模林嘉綺與高以翔等昨日出席時裝活動，兩位準媽媽甫見面即熱情攬攬「肚撞肚」！穿上鬆身裙的Lisa S.照着五吋高踭鞋，受訪時獲傳媒祝賀，心情靚靚地透露腹中寶寶是BB女：「Daniel（老公吳彥祖）好擔心第日個女帶男友返嚟，可能會打起上嚟！」她自言不介意BB性別：「生女好啲，自己係女仔可以了解多啲。（中國傳統認為生仔傳宗接代，有冇壓力？）冇！生仔生女一樣開心，遲啲可以再試多次！」

Lisa還自爆將布置BB房及買定嬰兒服裝，現時已有點緊張，希望能教好BB：「希望唔好似我細個咁曳！」問到前男友艾哲倫保迪（Adrien Brody）可有祝賀？Lisa說：「超過十五年冇見！可能唔知我有咗添！」她又指母親與奶奶希望來照顧她，令她非常高興：「我會喺香港生，醫療好，但未知順產定開刀，兩樣都驚，但醫生話我高容易生。」她希望能餵哺母乳，提到會否平胸比較難？她即自爆三個月重了16公斤：「大咗兩個碼，肥喺胸同Pat Pat！」

至於懷孕五個月的林嘉綺反而小心翼翼穿平底鞋，問到BB性別，她初時只稱名牌產品後繼有人，其後終認懷BB女。她又指近五個月周圍飛：「畀BB女見識吓Party！（畀佢入娛樂圈？）睇佢鍾唔鍾意，都希望佢做模特兒着靚衫！（老公鍾唔鍾意B女？）話佢想要咩都買畀佢，我呷醋！」返美國待產的她透露預產期為明年四月底：「美國人會靠自己氣力生！（餵人奶？）希望我有足夠『糧食』！」她還笑言將來女兒與Lisa的女兒能成為好友，一起當模特兒行騷。

高以翔則激讚同場的名模Carmen Kass有氣質：「好欣賞佢！（同外國人拍過拖？）之前喺加拿大讀書時試過！（依家想同中國人定外國人拍拖？）睇個性！唔理咩國籍，人好就欣賞。」他又透露早前拍攝荷里活電影演武士，角色狂野冇着褲！

另外，藝人林嘉欣昨日穿上黑色鬆身裙出席慈善活動，孕味甚濃，但她解釋因支持設計師朋友的作品才穿着該裙。問到是否未夠三個月怕BB小器？她說：「你話呢！唔知呀？我努力緊啦！但有同老公講如果到年底未得我就開工。」

Lisa S.（左）與林嘉綺兩位準媽媽撞到正，當然要交流佗BB心得！

Lisa S.獲「同行」蔣怡祝賀有喜，笑到四萬咁口。

另一台星隋棠亦有撐場，但衣着稍欠「峰」芒！

趙式芝（左）與Sean結伴出席活動，大方任影。

高以翔難得與名模Carmen Kass同場，激讚對方有氣質。