電飯煲黃鱔煲仔飯
一踏入農曆臘月就撞正降溫，好彩我一早就搬出我件“無敵”羽絨出來遮風擋寒！天氣凍冰冰，大家除咗要留心添衣保暖之外，營養飮食梗係要同步跟上啦。喺屋企煲返啲湯水來飮，暖胃又易吸收，平時三餐記住菜肉搭配，補充多啲蛋白質同纖維，得閒做下運動，身體有熱力有活力，咁就自然唔易受風寒喇。
身邊唔少上班族都話成日忙到“甩轆”，煲湯煮飯炒餸實在太複雜，好多時候索性就外食了事。其實屋企有電飯煲嘅話，想食餐“快靚正”飯又未必咁難。喺度老周我就要推介吓近排“實驗”成功嘅電飯煲煮煲仔飯。煲仔飯大家都唔陌生，我今次試整嘅係黃鱔飯，一來呢排黃鱔正好當造，二來鱔肉易消化又有益肝腎，啱晒冬天食。首先將劏好嘅黃鱔洗淨切段，飛水之後加入冬菇、紅棗、胡椒、薑絲、生抽等調味，醃半個鐘左右。自家煮飯就未必要用絲苗米咁講究，普通白米撈糯米就得，齋白米都冇問題，水就落平時煮飯嘅一半夠晒。等煮到啲水就來吸乾嘅時候，將醃好醬汁嘅鱔段倒入撈匀，鱔段鋪喺飯面頭，閂煲蓋煮到飯熟晒。電飯煲煮熟自動跳掣之後唔使急着開蓋，燜多二十分鐘，更加入味，之後就可以食到香噴噴嘅黃鱔飯喇。將材料換成田雞同臘味一樣啱食。
放工返來開吓電飯煲醃吓餸就有靚飯食，眞材實料又夠晒營養，外食一族不妨試吓！
|
|
