現年32歲的謝霆鋒，除是製作公司「PO朝霆」CEO外，向來投資有道的他，去年於兩個月內分別斥資1.17億元及9千多萬元購下中環擺花街26號及28號舖，而早年亦以2千多萬元買入擺花街壹號廣場地下6至8號舖，現已升值至1.2億元，短短八年間已躋身億萬富豪行列。
甲級商廈有潛力
野心勃勃的霆鋒，似乎不甘只做擺花街舖王，自從政府去年推出加強版額外印花稅後，有意將資金轉炒商用物業，睇準甲級商廈發展潛力。霆鋒被《好報》獨家爆料，指孖住好兄弟「龍之子」房祖名現身中環歎紅酒。身穿型仔西裝的霆鋒與便服打扮的祖名，步出後沿着皇后大道中一帶並肩而行，邊行邊密密斟，當記者上前問兩人神神秘秘搞乜？祖名說：「傾嘢啫！」而霆鋒一臉認真地說：「好大事囉！（然後伸手指向前面幾幢甲級商廈）都係呢幾幢囉！」問到是否有意收購？他說：「係呀！（係咪收購埋彤叔（鄭裕彤）棟新世界？）唔敢、唔敢。」
兩人跟記者傾完一輪，便乘車到荷李活道餐廳晚膳，醫肚後，意猶未盡的他們，仍繼續於附近散步吹水。昨日記者就睇舖一事致電祖名，他說：「嗰日得閒睇吓舖啫！都有傾吓生意經，不過都係好初步。」
霆鋒（左）和祖名日前結伴到中環睇舖，全程笑容滿面。
霆鋒不停手指指，祖名則朝向所指幾幢商廈。
霆鋒和祖名登車到附近晚膳，心情勁靚。
最新一期《好報》獨家踢爆霆鋒孖祖名炒中環商廈。