前幾日應邀過新會玩，雖然新會係我鄕下，但都已經好多年冇返過去。如今江門市經已大力發展旅遊業，今次返去感覺成個唔同晒。今次短線出行去咗兩日一夜，去咗濕地公園遊艇仔，順便參觀水鄕自然生態同小鳥天堂，之後就係去著名嘅古兜浸溫泉喇。

    今次過古兜撞正新會旅遊局搞緊“古兜水蟹節”，仲整埋個水蟹宴畀我試食，睇來老周我口福認眞唔淺。水蟹係新會名產，生長喺古兜山附近鹹淡水交界位置，殼薄、肉少、多汁，所以命名為“水蟹”。水蟹肉柔軟鮮美，又有清熱散結功效，無論蒸、煮、燉、燜，定係煲湯煲粥都好啱。首先一道水蟹粥上來已經香味撲鼻，呢度嘅水蟹粥係用香米、腐竹、同師傅秘製嘅海鮮上湯特別熬製，米粒煮到綿軟化開，飮落又滑又濃，粥入面仲有粒粒脆卜卜嘅蟹肉粒，眞係好食到一啖都冇得剩。跟住有原隻蒸水蟹都令人印象深刻，一人面前擺一大隻水蟹同一枝飮筒，原來係直接用飮筒啜蟹肉食；蟹肉蒸得柔軟鮮美，飮落眞係啖啖蟹汁蟹味！

    今次出來散心行程只得兩日，但又食又玩夠開心。講起來我識得唔少後生仔想帶父母外出旅遊盡孝心，但上咗年紀嘅老人家其實唔適合長途飛太遠，不如計劃吓內地短線遊，旣享受旅遊樂趣，又唔怕有太大體力負擔，可能仲適合佢哋！