春夏轉季奄仔蟹抵食
記得廿年前來澳門買手信，帶得最多嘅係奄仔蟹、鹹魚同蝦膏呢啲海產品。如今澳門已經唔同以前漁港風貌，大間手信店入面嘅海產手信亦都買少見少，唯有去海味店同街市先滿足到懷舊心情。好在隨住經濟發展，商品運輸都已經好發達，落街市隨時可以買到新鮮海產靚貨。呢幾日就已經見有新鮮奄仔蟹上市，梗係即場買咗幾隻拎返屋企慢慢料理。
奄仔蟹花名叫“處女蟹”，即係未交配、未產卵嘅靑蟹，產地要數我哋廣東呢頭最多。奄仔蟹肉身清甜、口感細滑，蟹膏雖然冇大閘蟹咁多，但顏色金黃，食起來又夠甘香，比起黃油蟹都唔輸蝕。買返來嘅奄仔蟹可以用水沖一沖先，唔使解開綑繩，直接放入雪櫃冰格雪上半個鐘。之後拎出來啲蟹已經凍暈，蒸煮過程中就唔會因為掙扎而整甩啲蟹鉗蟹腳。
奄仔蟹煮法多多，例如乾煏奄仔蟹，用高溫將奄仔蟹內嘅水分烘乾，再落啲葱、薑、鹽同白酒調吓味就食得，乾煏過嘅蟹肉同蟹膏特別香甜有嚼頭。最原汁原味嘅食法當然係清蒸，但有時間嘅話不妨試吓整個鹽焗蟹、煲蟹粥，或者蟹肉糯米飯，照
|
|
