香港坪洲海鮮抵食

    聽講今年母親節帶旺咗港澳食肆，連續幾個星期六日訂檯都係爆滿，老周我作為飮食業界一分子當然為其他行家高興喇。不過今次節日我就冇同廣大食客搶凳仔，而係陪老婆家人過咗坪洲，度過咗寧靜嘅一日。

    過坪洲唔算太遠，喺中環坐船大約四十五分鐘就到。一落船就覺得環境十分清靜，遠離都市繁囂，連空氣都特別清新。呢日我計劃帶家人食海鮮，於是就買咗沙鯭、中蝦同花蟹。之後老闆推薦我哋去一間連開飯網都未有人介紹過嘅餐廳，就係位於永安街嘅“簡快車”。今次除咗煮海鮮，仲請餐廳老闆整咗幾個小炒：一個咕嚕豬頸肉炒得十分脆口，酸甜度啱啱好；仲有個花雕蒸蟹火候都控制得好靚，蟹肉蒸出來清甜又爽口；再有個狗仔鴨同豉椒炒蜆，雖然都係常見中菜，但勝在食材新鮮味道好，認眞抵讚。我哋六個人一共食咗六道菜，連埋海鮮錢一千文有找，相信呢個價位如今香港都算少有喇。

    試想呢日香港無論係長洲、南丫島定係大嶼山，四圍都係人頭湧湧，食嘢貴到飛起，我呢個節日眞係過得十分寫意喇。飯後仲同屋企人喺島上散步，一齊呼吸新鮮空氣、閒話家常，實在係共聚天倫的好地方。