清火明目枸杞菜

    北風一起就正式進入冬天喇，好在我哋南方地區冬天唔算太凍，綠色蔬菜依然常常有。近排最當造嘅自然係芥蘭、菜心同枸杞菜喇，夠幼夠清甜，買返來煮餸啱晒。

    芥蘭、菜心相信大家都成日食，不過枸杞菜就未必人人都聽過。點解同紅色細細粒嗰種“枸杞子”個名咁似呢？原來佢哋係同一種植物上嘅不同部分：枸杞子係枸杞嘅果實，有少少甜味，功效補肝明目，用來沖水飮或者煲湯最多；枸杞菜係枸杞嘅莖葉，有少少苦味，通常用來涼拌、煲湯、炒菜同炒肉。查實枸杞菜不但含有豐富維他命C同人體需要嘅氨基酸，仲有清火明目、清熱止渴嘅功效，營養價値比起枸杞子一啲都唔輸蝕口架。

    平時喺屋企，可以整返個枸杞菜豬肝湯：將枸杞菜洗乾淨摘出葉子，梗唔要；然後洗淨豬肝切成薄片，用清水同白醋浸泡十五分鐘後再沖一次，去除腥味，跟住將豬肝同料酒、澱粉、鹽攪拌均匀，醃製十分鐘。鍋入面清水燒滾後放入薑絲、淋少少油，跟住落豬肝煮熟，再放入枸杞菜滾幾分鐘，最後加鹽調味，咁就搞掂。呢個湯材料簡單，但營養豐富，因為豬肝含有豐富鐵質、維他命A同蛋白質，搭配清火明目嘅枸杞菜一齊食，對保護眼睛同補血大有益處。如果唔鍾意食豬肝，換成瘦肉煲湯都得，或者用枸杞菜來炒雞蛋炒肉都一樣好味。家常飮食講究平靚正，咁好嘅蔬菜買返來開發吓新菜式都好嘛！