標題: 最得意情侶Laughing跟法拉搵食 [打印本頁]

---

作者: lwl2007    時間: 2011-9-4 11:00     標題: 最得意情侶Laughing跟法拉搵食

若說視帝后是電視城人氣寒暑表，套在Laughing謝天華和Madam Jo陳法拉身上也許用不着，二人未曾做帝后，如今互撐出戰；的確，Laughing加法拉做情侶檔視帝后錢途無限，有得諗！

攜「首」衝擊視帝

后記：天華覺得法拉嘅演技係咪有好大進步？

華：哈哈！法拉依家嘅演技係可以要我同佢敬禮，因為佢係我上司（劇中）嘛！有時佢真係做到不怒而威。

拉：我冇可能咁惡喎！其實我好溫柔o架！

記：咁法拉覺唔覺得有機會更上一層樓攞視后？

拉：講真，我都係第一次做呢類型嘅戲種，完全係一個摸索嘅階段，我同啲同事講，自己起碼成個月先Pick Up到做一個警察。呢個係一個階段，我覺得未能完全拿捏到個角色，未到好純熟。

華：唔係喎！你好有Madam Feel喎！哈哈哈！尤其係坐喺你辦公室入面。

拉：其實對呢個角色信心唔大，因為真係要花太多時間去揣摩。

華：我反而勁撐你！法拉中段開始慢慢有個氣勢出嚟，佢知道點令個角色立體，唔係第一步就不怒而威，而係慢慢滲出嚟，真係對佢另眼相看。

好Cute寸又Chok

記：咁法拉覺得天華今年係咪有機會首嘗視帝滋味？

拉：首嘗？係第一次咩？梗係支持佢啦！佢做視帝，我第一個撐！自從電影後，我同佢第一次喺電視劇合作，不過佢自從做Laughing呢個角色，呢個名已經係Part of佢嘅生活，喺佢嘅血液入面，唔係入唔入戲嘅問題，對佢嚟講係冇難度，駕輕就熟，佢創作到呢個角色性格，已經唔係刻意去演喇！太犀利喇！

華：係呀！依家啲人成日話Laughing又寸又可愛。

拉：係喎！佢寸得嚟又好有正義感。

華：不過寸同可愛係好難擺埋一齊，仲要佢Chok呢，真係唔易㗎！

拉：唓……你Chok就梗o架啦！

華：我一世人打過兩份工，第一份係做蠱惑仔，第二份就係做Laughing。

記：咁天華你寧願法拉係一個剛強嘅Madam，定係一個好溫柔嘅女仔？

華：當然Madam會比較有趣！小鳥依人會好局限，會規限到發揮，小鳥依人只要成日黐住個男朋友就得，但Madam同Laughing出嚟，大家會覺得好得意，究竟一對警察點樣去談戀愛呢？

拉：係，齋拍拖會好悶，我唔鍾意咁！

記：除咗拍警匪片，你哋想拍咩類型嘅戲？

華：一句講晒！當然係做螢幕情侶搵真銀啦！哈哈！好唔好呀Madam Jo，我跟你搵食。

拉：好呀好呀！不過係我跟你囉！

棄茶煲情定小明

記：《小明上廣州》點樣嚟？

華：Laughing同Madam Jo感情線幾特別，有別於一般劇集男女，最初佢哋係上司同下屬關係，Madam Jo本身有啲似《變節》入面嘅Karen（Laughing女友），為佢哋嘅感情埋下伏線。至於點解會唱呢隻歌，就由法拉去講。

拉：原本想唱《我是茶煲肥又矮》，但首歌太舊，想Update少少，就同監製講想要首得意又Cutie、依家街知巷聞嘅兒歌，諗到不如試吓唱《小明上廣州》啦！又OK喎！出嚟效果又好。

記：邊個提議？

華：係我哋兩個提議，一齊諗。我哋兩個睇劇本時，都對《我是茶煲肥又矮》冇乜感覺，首歌舊到阿媽都幾乎唔識唱，依家嘅小朋友更加未必聽過。

拉：我真係未聽過囉！哈哈！

華：我都未！

拉：唔好扮嘢喎！

華：當時大家個燈膽突然着咗：「不如就《小明上廣州》啦！」又諗呢隻歌最好拉埋小提琴，咁我哋真係走去學。

拉：真係，所以我哋真係搵個老師去學。

華：冇錯，因為拍嗰陣時係現場收音，要現場又拉又唱，唔係後期配音嘅。

拉小提琴有段古拉：我哋兩個本身唔識，由點樣揸，指法係點都要從頭學起，其實真係好難。

華：學咗一個月，值得嘅！冇諗過隻歌出嚟會咁爆！

拉：冇錯，好多觀眾都會提起呢隻歌，佢哋會覺得好得意，擺喺呢個場口度。估唔到喺警匪片入面，會氹到觀眾開心。

華：因為我哋想喺入面畀觀眾小驚喜。

拉：唔想成套劇都咁Heavy，天華同Bosco（黃宗澤）條線已經好沉重，所有嘢掹得好緊，所以我同Laughing條線想有啲喜劇色彩，可以輕鬆啲！

後記：靚仔靚女小朋友說話最真心，訪問當天，有個B女行過見到Laughing Gor，即大嗌：「Laughing哥哥好靚仔！」在旁的法拉問B女她是誰？B女說：「靚女Madam！」小朋友不會玩惡搞，也許天華和法拉人氣真的火紅呢！
                                                                                                                                              
天華撐法拉憑「Madam Jo」爭視后，法拉亦撐他再以「Laughing」一角出戰台慶頒獎禮。


                                                                                                              

                                                                                                              

                                                                                                              

                                                                                                              

                                                                                                              

                                                                                         

---

歡迎光臨 小花俠論壇 (http://disanna.com/)

Powered by Discuz! 7.2