寳利煲仔飯食足一個月
天寒地凍，有乜好得過整返煲香噴噴、熱辣辣的煲仔飯最啱胃口？不過煮煲仔飯講求控制火候，加上製作需時，願意製作的食肆並不常見。沙梨頭臨時街市對面、金灣豪庭地舖開了一間寳利煲仔飯專門店，常規口味多達卅款，僅三十三元起，每日一款都要食足一個月，咪話老闆唔落心思。
天氣寒冷需要攝入部分脂肪，富含不飽和脂肪的風鱔是健康人士的佳選，用新鮮靚鱔炮製的豉汁風鱔煲仔飯，色香味俱佳，飯香、鱔香衝鼻而來，任誰都難擋誘惑。不過煲仔飯最緊要有靚米，寳利深明此道，所選的米飯甘香軟糯，粒粒入味，讓人滋味無窮，在此前提下，一煲最普通、也最多捧場客的三臘（臘腸、臘肉、臘鴨髀）煲仔飯也深得人中意，再用秘製調料撈一撈，唇齒留香，才叫滋味。另外一款値得推薦，也是較鮮見的滋補白鴿飯，具有滋補益氣、壯體補腎功效，合乎冬日進補的原則。
除了煲仔飯，寳利也有若干撚手小菜値得一試，以新鮮雞製作的手撕雞，唔單止冇雪味，雞肉更加爽口嫩滑，加入海蜇撈匀，一款清新爽口的小菜就此誕生。食過煲仔飯覺得少少熱氣，可以整返枝老闆娘在中藥房任職多年的父親自家製靈芝雞骨草或秘製龜苓膏，確係眞材實料冇花假。寳利營業時間早十晩十，關鍵是外賣堂食皆可，滿足足不出戶歎美食的慾望。
嘻 嘻
|
|
