標題:
謝老四熱血暖心窩
[打印本頁]
作者:
chan200308
時間:
2014-2-13 17:41
標題:
謝老四熱血暖心窩
1個入球1次助攻、全場87%準確傳送率、8次成功攔截......，禮拜三寒夜睇英超，全靠謝拉特夠醒神，令人熱血沸騰。對球賽嘅熱情、對爭勝嘅執著，謝老四並冇隨年月消減，就算唔係利迷，都要向佢salute！
呢晚兵魔戰客氣啲講，係緊張不精采（大家睇幾廿年波，都明強撼強多數係咁），唔客氣講直頭有少少恰眼瞓（只怪十三唔係兩隊粉絲），於是拎起遙控器左按右按，大部分時間都停喺富咸對利記嘅畫面。好彩係冇錯過謝拉特（Steven Gerrard）妙傳刺穿人心臟，造就史杜列治扳平，真係就瞓著都醒番晒；更好彩係呢場波係遲15分鐘開波，所以亦冇錯過睇佢老哥射入奠勝12碼。
睇佢冷靜射入12碼唔精采，精采係佢入波後好興奮除波衫成個彈起，呢啲就叫熱血沸騰，邊似好多球員去到季中踢到厭戰，或者怕輸怕傷就住踢！睇33歲嘅佢成世效忠紅軍，件汗衣都係紅色，而流嘅血同你我唔同，呢種紅，係紅軍嘅熱血。
賽後謝老四話唔只要爭前4，仲要爭聯賽冠軍，呢番話夠晒激昂，盡顯隊長風範。季前睇佢橫眉冷對千夫指，三番四次公開勸當時犯眾憎嘅蘇亞雷斯留隊，事實證明佢睇通睇透；舊年12月睇佢受傷，以為傷完有排至操番起，偏偏復出踢9場已經入4球兼有3次助攻，同輩球員個個要靠邊站。
聽聞紅軍領隊羅渣士向英格蘭主帥鶴臣獻計，建議將謝拉特喺利記嘅「控球中場」角色複製到三獅軍團，計我話佢踢個個位都掂，好似呢場絕大部分時間留喺中後場，咪一樣傳球靚波兼有波入，鶴臣都教過紅軍好熟謝老四，駛鬼你教咩！
如果你問十三，來季想睇邊幾隊英超踢歐聯，第4隊一定係紅軍（熱刺唔慌走得遠、曼聯？爭氣啲先講啦），講到尾，唯一原因係想睇謝老四。
足球迷叫第十二人，冇偏愛，冷眼旁觀係十三。
歡迎光臨 小花俠論壇 (http://disanna.com/)
Powered by Discuz! 7.2
