標題:
跑成12km 奧斯爾好懶咩？
[打印本頁]
作者:
chan200308
時間:
2014-2-20 23:12
標題:
跑成12km 奧斯爾好懶咩？
巴布賽前話佢衰體能、法米尼喺比賽時同佢推撞、波歷克話佢迷失……，奧斯爾慘被圍攻，大眼仔真係咁差咩？有冇人幫佢講半句好話？
一隊波喺大戰失利自然愁爆，廠迷最愁一幕，大概係奧斯爾喺後牆同法米尼發生爭執，除咗口角仲有輕微推撞。英國傳媒機不可失即時大造文章，指出內訌，又翻炒之前奧斯爾輸俾曼城後即時返更衣室，冇隨大隊向廠迷致謝，因此跟同胞梅迪薩卡口角……。
問題出咗，大家都問：奧斯爾態度有問題？佢懶散嗎？
查實如果佢射入球12碼，可能已被捧為贏波功臣，點會好似依家變狗熊？射12碼呢家嘢，學桂神話齋一係入，一係唔入，雲加賽後對奧斯爾射12碼有微言，話步距有問題。心水清廠迷應該記得，大眼仔喺分組賽對馬賽射失12碼，雲加都講過同一番話，只係當日贏波笑騎騎，家陣輸波面燶燶。
要一個人改射12碼習慣，你估咁容易，已故嘅巴西名將蘇古迪斯當年對法國踏一步射失12碼，你估佢有冇因為宴客過就改變？
講到懶，呢場波嘅跑距數據又證明大眼仔絕對唔懶，佢全場跑11.69km，全場只有兩個人，即氣袋法米尼（13.53km）、韋舒亞（11.80km）畀佢多，單睇呢個數據，肯定唔係懶跑懶追波嗰隻。
講到態度，以前皇馬高層話過佢態度差，但當時雙方已鬧翻，不可盡信。古來好波球員總有性格、有情緒，唔係個個好似謝拉特咁熱血同有領袖風範，至配稱好球員。當日拒向廠迷致謝，佢事後都肯認衰耍冧，算係咁。只要佢交到貨，到時仲邊個會話佢態度有問題？
奧斯爾家吓係唔順景，但問題未必想像中咁差。英國人喺大賽被德國人壓抑多時，唔乘機抽水、以筆殺人就有鬼！希望大眼仔唔好受外間反應影響，快啲踢番兩三場好波，盡除陰霾。十三中立，只想睇好波，好似佢盤傳技術咁到家嘅球員，英超所餘無幾囉。
歡迎光臨 小花俠論壇 (http://disanna.com/)
Powered by Discuz! 7.2
