標題: 5路英軍……歐洲賽0入球 [打印本頁]

---

作者: chan200308    時間: 2014-2-26 12:58     標題: 5路英軍……歐洲賽0入球

好耐冇睇到英格蘭球隊喺歐洲賽咁失威。曼城、阿仙奴、熱刺、史雲斯及曼聯喺過去一星期內踢嘅歐洲賽竟然顆粒無收，對於仲係迷信英超盛世嘅人嚟講，有冇感到一盤冷水照頭淋？守尾門嘅車路士，靠晒你。

曼城、阿仙奴主場分別輸俾神級嘅巴塞、拜仁都算，但如果只將輸波責任歸咎於紅牌阿姑迪米捷利斯或者射失12碼嘅奧斯爾，未免掩耳盜鈴。至於熱刺留力輸波仲有價講，史雲斯攻唔陷拿玻里，放虎歸山反映埋門唔掂，照睇次回合難免苦戰，但總可以話踢過超水準為一旦出局開脫。

好嘞，講番啱啱敗走希臘隻紅魔，好耐冇見過一隊咁士無鬥志，令人咁陌生嘅曼聯。十三跟官方數字，曼聯5次射門得兩球中，再睇陣中被公認最高級數嘅尹佩斯，全場24次觸球、傳過13次波咁大把，咁嘅表現真係唔見得人，話晒下半季孤注一擲攻呢個盃賽，真係破蛋都咁難？喺費格遜領軍年代，呢隻紅魔落後總會張牙舞爪，越戰越勇氣勢迫人，今季曼聯落後情況下交到貨，大家記得幾多場？

冇諗過莫耶斯用兵冇變化，賽後講嘢都好似播錄音機咁冇變化，離不開願負責，踢得差但面前仲有機會......老友，好悶啫！好相信曼聯次回合返奧脫福會踢得好啲，不過大半個月後軍情唔同晒，十三暫時唔估計紅魔能否平反敗局，只知當日係大審判日，隊波再踢成咁，佢一定首當其衝難脫罪。

若然有罪就要受罰，莫耶斯捱得過嗰日至好講新一季組軍大計，唔該！

英軍過去一周歐洲賽戰績
25/02 曼聯 歐聯16強客負奧林比亞高斯0:2
20/02 史雲斯 歐霸盃32強主和拿玻里0:0
20/02 熱刺 歐霸盃32強客負迪尼普0:1
19/02 阿仙奴 歐聯16強主負拜仁慕尼黑0:2
18/02 曼城 歐聯16強主負巴塞隆拿0:2

---

歡迎光臨 小花俠論壇 (http://disanna.com/)

Powered by Discuz! 7.2