小花俠論壇 - Powered by Discuz! Board

標題: 關於費托「最後一腳」陰謀論 [打印本頁]

作者: chan200308 時間: 2014-4-29 00:33 標題: 關於費托「最後一腳」陰謀論

昨晚車仔大戰利記，是典型強強對疊，而且此戰對英超冠軍誰屬起了關鍵作用。最後車仔以2：0將矢志首奪英超的利記斬落馬下，令英超冠軍再添懸念。　

此戰話題甚豐，有「謝四」不慎一跣，亦有「Daddy」摩佬的氣場Yeah Yeah Yeah，但當中最爆的，卻落在費托92分鐘57秒的一腳助攻之上。

情況與當年歐聯對陣巴塞一樣，費托後備上陣，對手焗攻，一個反擊之下，皮球落在費托腳下，他推了半場，今次旁邊多了一個韋利安幫手，面對可憐的米洛列特，呈「兩隻手鬥兩對腳」之局；在大家冒汗之際，費托看見米洛列特出迎，決定做「不射男」，橫傳予韋利安，讓後者輕鬆射入，將比數改寫成2:0。

也不用兩分鐘，討論區已經「洗版」，在討論費托這「最後一腳」。這夜陰謀論此起彼落，眾人想法大約分為幾點，一為信心論：「哇！費托使唔使無信心到咁呀！單刀都唔敢射？」二為恥笑論：「費托一定驚又再單刀唔入，比人恥笑到下年啦！」三為真利論：「費托真係真心利迷！最後唔忍心由自己入利記波！！身在車營心在利呀！嗚呀！YNWA！」

究竟費托個心點諗，都真係要佢本人先知。但以波論波，我覺得費托最後一腳處理得妥當。如果是1對1決戰，費托當然要射，但當時2打1，加上龍門已經走出幾步，自己射入的機會當然也大，但橫傳給韋利安卻是「99%入波」。另外，雖然當時已經92分鐘，但別忘了利記對曼城一戰，也是最後階段入波，對謝四等人而言，如果當時費托唔入，這最後30秒會否出現勇戰下的奇蹟亦屬難料。

其實，費托這個「穩陣」選擇頗為合理。當然情感上，利記始終是自己成名地之一，我想即使費托入波，內心亦會五味雜陳。既然如此，何不交出助攻，讓韋利安去慶祝，自己走在一旁，為紅衣人生留下一份敬意？

歡迎光臨小花俠論壇 (http://disanna.com/)