小花俠論壇 - Powered by Discuz! Board

標題: 利迷有say：大巴上的賽後檢討 [打印本頁]

作者: chan200308 時間: 2014-4-29 17:56 標題: 利迷有say：大巴上的賽後檢討

身為一個資深利迷，25年前即1989年，親眼喺電視目睹利物浦一場聯賽大勝對手9:0，對手是水晶宮。

剛過去的星期日慘敗，令利物浦陷於爭標劣勢。第2日返工，虛虛浮浮，渾渾噩噩，朝早東鐵故障，車站逼到入都入唔到，作死轉去搭巴士，點知一塞兩個鐘！

都好，有兩個鐘自我反省、自我安慰，諗下輸畀車仔代表啲乜？客觀啲睇。其實隊波係未夠成熟囉。

（1）今季有N個機會追近同曼城嘅球差，都逐一錯過。例如：對曼城、對諾域治都有權贏3:0。但後防不穩，又把握唔到。未能鎖定戰果，入得多失得多，球隊攞唔到得失球優勢。

（2）球員板櫈深度不足，史杜列治剛傷癒缺態、軒達臣停賽，惡果呢兩場反映晒出嚟，想換人都唔知換邊個好。

（3）戰術單一，冇變化。有放冇收。具經驗球隊，星期日場波係要穩陣攞1分。但利記太強求主攻，中正車仔圈套。謝四出事時係46分鐘，根本成隊波唔應該推咁前。唔意識半場和已經好有利，冇保護有利戰果。所以，搞到而家咁，唔係謝拉特一個人嘅錯，成隊都要負責。

衝冠要交學費，學費好貴，但處理得好，隊波交咗學費可以學到好多嘢。要知道呢隊係年輕球隊，仲有大把機會。所以不用深責。

好！諗到呢度，仲喺東隧塞緊，再諗！咁而家係咪投降先？邊個話利記唔可以爭取主動先？如果我係羅渣士，而家會度下點喺餘下兩場爭取勝利同入球。

曼城而家得失球差+58，多賽1場嘅利記+50。假設曼城贏晒3場，最少都+61！即係話利物浦最少兩場要入11球先有機會計點數！

係咪天方夜譚？係！係咪機會渺茫？係！係咪無可能？唔去試就一定無可能。

曾經見過皇馬3場入18球，曾經見過89年有班尼斯、比士利同艾德列治壓陣嘅利物浦以9:0贏波。利記咁啱下場對手就係水晶宮。有無半點啟示呢？

唔係大言不慚、唔係睇低水晶宮或紐卡素，事實上兩隊都唔易應付，未敢言勝。只係話命運從來都喺自己手，要寸土必爭，盡力最緊要。利記今季連續兩場嘅最高入球紀錄為9球。11球有無得諗？就當呢個係壓力測試，考驗球隊喺壓力下爭取最大勝利嘅能力，縱使最終唔能夠通過測試，都贏得經驗。

當然愛華頓幫到手又作別論。

折騰兩小時，終於返到公司。撞鬼，明明前一晚先衰係大巴戰術下，做乜仲要搭巴士，下次點都唔喺繁忙時間搭呢號車返工。人係要喺錯誤中學習。利記加油！

歡迎光臨小花俠論壇 (http://disanna.com/)