標題:
白飯魚鬥波鞋？有得鬥！
[打印本頁]
作者:
chan200308
時間:
2014-5-5 18:32
標題:
白飯魚鬥波鞋？有得鬥！
又係那些年的時候，今日打開報紙見到有媒體報道，有一個集體回憶可能隨時日過去而消失，而呢個回憶就係同足球密不可分嘅……「白飯魚」白布鞋。
薄荷糖話晒都係「80後」，中學時期去球場睇班師兄踢波，好多都仲未著波鞋。正確啲嚟講，係佢哋拒絕著波鞋，因為波鞋貴，踢石地好傷，好快就爛，免得心痛。白飯魚就唔同，雖然真係踢幾場就爛，不過廿蚊一對，一對波鞋嘅價錢可以買多幾對！
睇篇報道，最深刻印象嘅都係講佢嘅「性價比」，南華、晨曦前大將山度士講到白飯魚價錢非常相宜，更重要嘅係佢嘅特性：又輕又薄，而且非常貼腳、尤如無著，著得白飯魚去踢波的人一定在街場訓練有素，技術出眾。看到這裡，薄荷糖就幻想出一個畫面：球場上名廠波鞋與白飯魚的對碰，身價可能差好遠，但踢出嚟嘅可能都係燒鵝脾的味道！
我諗大家都估到薄荷糖想講咩題目喇！早前有網友自己做資料搜集，計晒球隊中每個人嘅轉會金額，再作比較。結果係，馬體會整隊波計計埋埋值5600萬鎊；而皇馬呢，就要成4.1億鎊，差唔多係8倍之差！而白飯魚呢？一對計到盡30蚊，一對8倍價錢的波鞋就係240蚊，唔單止有得打，波鞋仲隨時輸俾白飯魚添！
所以話，只要一講到錢，其實好多嘢都會變晒質，講到足球大家總係講緊身價、含金量，咩馬高列奧斯underpay 呀！佢走硬啦！美斯逃稅噃？朗尼邊值30萬鎊周薪呀！如果有一天，每一位球星都可以脫下佢哋嘅人類工學結晶、最強球鞋，穿上普普通通白飯魚踢返一場波，可能大家就會感受到足球嘅真正意義喇！
歡迎光臨 小花俠論壇 (http://disanna.com/)
Powered by Discuz! 7.2
