標題: 陳山聰：會好好保護超雲 [打印本頁]

---

作者: lwl2007    時間: 2011-9-19 13:18     標題: 陳山聰：會好好保護超雲

有「雲山戀」愛情滋潤的陳山聰，昨日「復出」擔任剪綵嘉賓時，明顯發福兼左手無名指更戴上戒指，但他否認有特別含義！對於賭王三太陳婉珍指如果超雲有喜會幫手湊B，他說：「我當然會好好保護佢啦！」

無綫藝員陳山聰與出爐港姐冠軍朱晨麗昨日到新蒲崗MIKIKI商場為BLU SPA主持剪綵儀式，但山聰比原定剪綵時間遲了15分鐘才到場，剪綵儀式也要等他才開始，事後他解釋：「我唔知，經理人話係呢個時間！今日唔係咩正式復工，上次都有出過嚟，只係冇做訪問！」

撐女友冇肥

對於三太早前表示，若然超雲有BB會幫手湊，山聰說：「呢啲只係假設性問題！（你哋好小心？）咁私人嘅問題唔答，我當然會好好保護佢啦！」他在中秋陪賭王何鴻燊賞月，看來大有機會做何家女婿？他說：「唔係，我只係超雲嘅男朋友，我都知大家關心我哋嘅感情事，希望大家畀啲空間我哋！」他表示未有因與超雲拍拖而令工作量大增，他亦抗拒與超雲以情侶檔搵銀。問到「雲山戀」後有沒有加酬勞？他說：「冇問呀！一向都係有嘢做就做，合理價！（依家唔憂做？）唔係！」

外界有指「雲山」愛得甜蜜兼齊齊發福，山聰說：「佢冇肥呀！咪同之前差唔多，佢都食好少嘢！我就之前跑馬拉松暴瘦啫！依家都係肥咗幾磅，嚟緊開劇做大富商要肥番少少！（何家女婿都係肥肥哋？）冇，我都話我只係何超雲嘅男朋友。」早前有指無綫雪藏只顧拍拖的他，後來他與超雲約樂易玲飯局「破冰」，山聰說：「冇收過雪藏通知喎！之前屋企突然有事，已經同公司請咗假，公司都好了解。之後就去咗英國接超雲，其實以往每年我都有3、4個月冇開工放假，以前你哋冇咁留意我啫！處理好屋企嘅事之後又冇即刻接到劇，所以咪放假囉！公司冇召見我，同樂小姐食飯都只係飯敍傾偈，我哋一向都溝通得好好。」

                                                                                                                                              
山聰晒無名指上的戒指，未知超雲可有同一款呢？


                                                                                                              

                                                                                                              
超雲與山聰日前着情侶裝亮相，甚有璧人Feel！


                                                                                                              
近期人氣勁爆的山聰（左一），與朱晨麗（右二）擔任剪綵嘉賓。


                                                                                                              
朱晨麗雖然悉心打扮，但仍被山聰搶去風頭。

---

歡迎光臨 小花俠論壇 (http://disanna.com/)

Powered by Discuz! 7.2