標題: 謝安琪•悔 靠信仰渡難關 [打印本頁]

---

作者: lwl2007    時間: 2011-9-20 20:31     標題: 謝安琪•悔 靠信仰渡難關

謝安琪（Kay）自小已跟母親返教會，無時無刻祈禱與主傾偈，堪稱虔誠基督徒，勢估唔到她事業正起飛，剛加盟環球做陳慧琳師妹時，突爆出「未婚懷孕」消息，網民直斥她犯下誡條！Kay承認當時有慌亂一刻，幸得牧師及家人支持，但未想過退出，更為自己的過錯向唱片公司道歉。


好細個已經跟媽咪返教會，無時無刻都會祈禱，成日都會用個心同佢傾偈，我相信神係住喺我心入面，人總會有啲時候做得唔好，梗會慌亂，我有返教會同教友講呢件事，所有人衷心祝福我、支持我，我好感恩！每個人條路唔會平坦，但有信仰就算遇到幾大風浪，信仰都會支持你，冇試過有人喺我面前講啲唔好聽嘅說話，我諗最虔誠嘅基督徒，都好參透到聖經所講，最想每個人都活喺人生中，無論係好嘅時候同差嘅時候，都靠信仰渡過難關。

覺得公司喺呢件事上好快作出應變，令我有時間休息，仍然可以幫我做住佢哋能力範圍內嘅宣傳，又安排時間畀我去錄音，亦安排到點樣喺我生完BB之後，可以順利同大家見面、出唱片同唱歌，成件事配合得好好。我好少諗人生幾時會做錯嘢，事情發生咗，你就要去面對同處理，我有同公司講對唔住，有同一齊合作嘅人講，為大家帶嚟不便同麻煩，希望大家體諒同幫手。

懷孕激發高昂鬥志

懷孕時係會好開心，生命影響力好強大，好強大應付所有嘢，嗰時個人鬥志好高昂，我一定要做好媽咪，迎接小生命來臨，要畀最開心嘅屋企佢。我冇擔心前途，講真出道唔係好耐，人生冇得預計，當你嗰刻成績好好，有啲歌好受歡迎，潮流好快，難保唔到首歌同隻碟好受歡迎，咁佢出年做梗乜，大家唔會知，咁只能講人生係好長，家庭係陪伴你一生一世，一個小朋友出世都係陪你一生一世，嗰刻我覺得工作上我仲有時間去努力，依家家庭、小朋友係第一位，要最維繫同保護呢樣嘢。（明日待續）

                                                                                                                                            
Kay承認人生總會有做得不夠好的時候，幸得信仰助她渡難關。


                                                                                                              
Kay事業正起飛之際，竟與張繼聰爆出奉子成婚，其後誕下兒子張瞻。


                                                                                                              
當年Kay在黃劍濤（左）和經理人陪同下，開記者會宣布懷孕三個月。


                                                                                                              
Kay目前將兒子放在第一位。

---

歡迎光臨 小花俠論壇 (http://disanna.com/)

Powered by Discuz! 7.2