蘇亞雷斯又咬人像個BB牙仔痕
睇夜波須養精神孱者病魔易攻陷
世界盃如火如荼，十六強展開淘汰賽，亦即生死鬥，對賽者兩個只能活一個。
分組賽被摒出局者，最慘係英格蘭，未償一勝包尾，盡失英超風範，返國無人接機，好現實。英超在各地聯賽中最好睇，擁有四五支爭標勁旅，各隊打法快速，戰情可觀。比起西甲僅得皇馬、巴塞、馬體會及德甲拜仁、多蒙特，戰況更激烈，從欣賞角度更好睇。
不過，英超雖刺激，並不等於英國球員好波或超班，事關很多強隊都有外援，打得英超者，技術有返咁上下，加埋本土精英，形成各隊實力強橫，有些勁旅實力還比某些國家隊好。英格蘭儘管有大球會培育人才，但這麼多年來，未見有衆多朗尼出現，自上世紀六六年贏得世界盃後，四十八年來都與冠軍無緣，與其個人技術、整體合作及打慣高Q大棍很有關係。今屆人腳比近幾屆好，無奈冇運行，令擁躉徒呼奈何。
另一支出局勁旅意大利，打世界盃經驗足夠，但後繼乏人，老油條多，推進緩慢，防守雖好，卻欠攻力，蛇都死。
每屆世盃都有打茅波，今屆又有最騎呢大趣聞，烏拉圭蘇亞雷斯第三度咬人，棚哨牙犀利過大白鯊。BB仔牙痕才會咬奶嘴，哨牙蘇早已戒奶，咁大個仔還效法遠古食人族，認眞羞家。如今罰停賽四月兼破財，陀衰國家及其球隊，個人名譽掃地，成世畀人笑爆。
今屆比賽在南美舉行，打生美洲球隊，卻成為不少歐洲隊葬身之地，證明地利很重要。幸好還有德國、荷蘭、法國“尙在人間”，希望與巴西、阿根廷鬥到最後，冠軍由南美對歐洲，好睇矣。
不過睇還睇，最緊要養足精神，通頂只係夜鬼強項。內地就有幾名球迷睇到瓜老襯，大賭更無謂，輸到要跳樓，生命何價。有香港親戚話佢寫字樓部門就有數人睇波病倒，有些女仔根本唔識波，為免邊緣化，與同事有話題，也睇埋一份，結果亦跪低，如此做“假球迷”，代價太大矣。
|
|
