小花俠論壇 - Powered by Discuz! Board

標題: [香港新聞] 水炮車取經多餘帳篷陣不拆禍大 [打印本頁]

作者: jose1057 時間: 2015-6-10 10:42 標題: 水炮車取經多餘帳篷陣不拆禍大

警方計劃斥資二千七百萬元購置三部俗稱「水炮車」嘅「人群管理特別用途車」，畀反對派質疑用途，其實仲使乜質疑吖，答案已經寫在牆上喇。呢，政改方案表決在即，警方話正計劃派員到曾經使用水炮車嘅地區取經喎，唔使問阿貴，梗係針對政改表決觸發嘅大型示威活動喇。

太一叮冇亂噏o架，雖然三部水炮車未落地，對於下星期立法會表決政改大戰，或者遠水不能救近火，但大家都知，政改一旦破局，社會勢必更加撕裂，政局勢必更加動盪，佔領、鳩嗚等激進示威行動勢必更加頻繁，水炮車真係不愁無用武之地o架。風頭火勢之下，當局到外地參考水炮車處理大型公眾集結嘅經驗，一啲都唔奇怪，問題係，港府執法向來虎頭蛇尾，虛有其表，就算外國成功，香港亦未必成功，到時所謂嘅外訪取經咪變成法國大餐，多舊魚？

唔係咩？如果港府真係重視法治，早就對立法會外面嘅違法帳篷陣依法取締喇，又點會任由示威者為所欲為，無法無天吖。東網記者尋日到現場視察，發現帳篷之內秘密存放咗近百個未有標示用途嘅玻璃樽，四圍又有滅火筒、超市手推車，地上仲有一個由三十幾個頭盔組成嘅「頭盔陣」添，甚至有大型帳篷裝上密碼鎖同閉路電視，成個軍事基地一樣，簡直匪夷所思。當局連對區區帳篷陣都束手無策，未來仲點樣處理「十萬人圍立法會」嘅浩大場面呀！

正所謂，來者不善，善者不來。帳篷陣一直盤據不散，擺明衝着政改表決而來，尤其係近日流傳有人偷偷運入大量利刀、木條等攻擊性武器，隨時成為激進組織暴力衝擊甚至佔領立法會嘅軍火庫，當局養虎遺患，愚不可及。就講嗰近百個空玻璃樽吖，只要裝上火水，綁上點火嘅布條，就變成具有殺傷力嘅燃燒彈，隨時搞出大件事。嗱，本報記者已經踢爆危機，港府如果仲唔速速補鑊，遲早火燒後欄嘅咋。

講起唔知好嬲定好笑，當局唔敢清拆帳篷陣，反而偷偷安裝閉路電視監察，本末倒置。無計喇，鬼叫港府無能咩，個個部門都縮骨卸膊，有法不依，搞事者唔有恃無恐至奇喇。喺國內，國家足球隊由於表現不濟，淪為國際魚腩部隊，被人嘲笑係太監上青樓，無人能射，其實喺香港，港府對帳篷陣軟弱窩囊，一樣係太監上青樓，無人能硬！

作者: simo 時間: 2015-6-11 06:48

同意話呢樣嘢係: 法國大餐…多舊(鳩)魚

歡迎光臨小花俠論壇 (http://disanna.com/)