標題: 森美求戀靠真情 [打印本頁]

---

作者: lwl2007    時間: 2011-10-9 13:10     標題: 森美求戀靠真情

現年38歲的森美，未認識太太前原來拍拖經驗一隻手數得晒！揚言從未追女的他究竟如何當愛情顧問？他說：「讀書時專注學業，嚴格嚟講我係宅男。」宅男做顧問豈不是紙上談兵？他說：「講真！追女仔邊有『橋』，最緊要膽大心細面皮厚，再加埋靚仔有型，但唔係個個都有天分，所以我用科學方法去教人談情說愛，有晒實驗結果。」

拯救弱男  靠晒謝霆鋒

最近熱爆的「蛋糕男」，因忘記買生日蛋糕而激嬲老婆，打電話到電台喪喊求救，掀起網友談論，愛情專家森美對此說：「時下『港男』變『弱男』，生日蛋糕之嘛，冇買咪冇買囉！使乜喊住打嚟呀？點解依家啲男人咁樣！」森美認為「港女」隻手遮天，全因香港「情聖」瀕臨絕種。

究竟心目中的「情聖」是怎麼樣？森美讚謝霆鋒是絕無僅有、香港最後一個「情聖」：「雖然霆鋒生於80後，但佢對愛嘅熱血係人都知，佢真係幾肉麻都有，當眾大叫『我愛你』濕濕碎。佢擁有90年代男士嗰種『情聖』特質，將愛情放到好大，當年嘅男仔為氹女友追巴士、唱情歌、淋雨甚至屋企樓下等通宵，當時啲女仔被呢份熱愛包圍，為愛情捱窮亦好平常。」森美認為「港女」出現，因為男人不再為愛情灑熱血，他說：「港女愈嚟愈有地位，男人為搵食冇晒浪漫，『情聖』買少見少。」故他提倡「盡情去愛」，只有真愛才能溶化「港女」，救「港男」出火海。

亂扮情聖  隨時反效果

不過，森美強調並非每個男人照辦煮碗「情聖」言行便可得永生，他說：「當然要有番咁上下靚仔有型啦！你估個個留長頭髮攞住結他就變謝霆鋒咩？冇咁Rock就變區瑞強！」已有一子一女的森美坦言會教兒子做「情聖」：「人與人之間係要用『愛』去維繫，『情聖』係一個態度，代表對愛情嘅熱誠，對生命嘅激情，依家好多人太冷漠！」

                                                                                                                                         
森美指拿着結他示愛的「情聖」買少見少，個個變晒弱男。


                                                                                                              
森美自言追女最緊要面皮厚，不知當年他追太太時是否這樣？


                                                                                                              
森美教人追女仔經驗豐富，亦參演不少愛情電影。


                                                                                         

---

歡迎光臨 小花俠論壇 (http://disanna.com/)

Powered by Discuz! 7.2