標題:
787廣島紅夢肥蠔有憶 - 日本廣島
[打印本頁]
作者:
山道♂飄移
時間:
2011-10-28 11:29
標題:
787廣島紅夢肥蠔有憶 - 日本廣島
昨日各報同新聞都有講，全球第一架波音 787Dreamliner航機首航香港，我，就係坐佢返來的第一批夢遊人。官方話要給時間讓機師們更熟習航機再作長程飛行。所以 11月1日起航班先飛羽田到岡山及廣島航線， 12月先衝出國際飛北京。嘿！狡辯！你班日本人咪諗住呃我！計我話，11月必去廣島，因為……
紅爆神之島
■島上小鹿儼如島主，唔驚人，任影。
紅葉！現在有邊個旅記沒有绩實日本各地個紅葉地圖！天氣暖化關係紅葉期大抵延遲了半至一個月。由廣島約只一小時距離的宮島紅葉谷公園，谷裏都是火紅色的伊呂波楓或山楓。你望見張相好紅係咪？講白你知係借位呃你的！實情現在島上紅葉得幾棵，但小河邊的楓樹已率先變紅，藍天下透着陽光，還是搶入眼球的那種艷紅了。預計 11月初或中期那紅會升級，伴着一樣紅得過火的傳統紅橋，及倒映在神寺外、海中央的朱紅鳥居，神之島一樣的神秘景致，令宮島在11月變成旅遊旺地。
■因為 70年代時 ANA 727首次國際航班就是飛往香港，所以四十年後的今日劃時代新機出現，第一時間飛香港，仲送乘客 787頸巾做紀念。
■嚴島神社是拍結婚相的指定地點之一！
■紅葉谷公園到處是小鹿！
■陽光下，首輪紅葉已經紅得火了。
紅葉谷（紅葉期： 11月初起）
交通：宮島碼頭往山坡走約 20分
地址：廣島縣廿日市宮島町紅葉谷公園
必食肥蠔．鰻魚．松茸餅！
■碼頭鄰近更有宮島新名物——和奏。用宮島長的稻米作飯糰，放上蠔或鰻魚，塗上秘製醬料的烤蠔/鰻魚飯糰，約 300日圓。
10、11月可是收穫之秋，廣島特產肥蠔、鰻魚同松茸都係體態最豐腴之時，而冠絕日本全國的廣島蠔，特別係地御前蠔長得更加肥滿甜美！且自從輻射以來，除了香港，連日本好多賣蠔的食店都以「轉用廣島蠔」做招徠，成個島由街邊小攤檔，到商店街旅遊書必載的老字號蠔店統統都在烤，那種香，至今仍在記憶中回味。
■牡犡屋人氣燒蠔約 1,000日圓 4個，午市時間排隊預最少等半小時。
■ゆス忠人氣蒲燒鰻魚飯約 1,700日圓。
牡犡屋
地址：廣島縣廿日市市宮島町 539
電話：（ 81） 8-2944 2747
ゆス忠
地址：廣島縣廿日市市宮島町中之町濱 507-2
電話：（81） 8-2944 0125
和奏
地址：廣島縣廿日市市宮島町北之町濱 1183-2
電話：（ 81） 8-2944 2075
親試 787 Dreamliner一路好瞓
講番這場 Dreamliner體驗。這部預計會改變往後航空業飛機設計的飛機，雖然只是中型客機，但省油（省了30%），特別的機翼同穩定系統令航行更加順暢，機內氣壓減到最低，機艙又夠安靜，務求要令大家一路瞓得舒服瞓得好。老實說機上採訪原來好辛苦，你想想百幾人，個個托住攝影攝錄機拖住條咪線，同餐車爭路採訪，簡直係噩夢！如遇氣流啲人實埋唔切位又係點情況？不知是幸還是關架機事，4個鐘機程居然少有地未有發一次「遇氣流，請扣安全帶」通知。我仲唔覺意瞓咗一場，雖然張椅不能躺下太多，但闊了，椅墊又夠厚的關係坐得都幾舒服。
內陸機場假瞓一場
1.機艙內氣壓減到最輕，大家各出奇謀做氣壓大測試，除了氣壓計外，姐姐吹定個波上機，到 3萬 8千呎高空時個波居然仲原封不動無變大喎！
雖然現在只得一部 787。但今年年底將增加至 9部， 12月向國際出發飛北京， 1月去歐洲。未有機會坐者，羽田機場內陸航線有個「Museum」有幾張商務客位的機椅給你試瞓。經濟艙座椅採「某航空公司被投訴到九彩」的下滑式座椅，不過這回坐墊弄得夠厚，座位寬度也夠寬，所以坐得比前者的「尼龍床」舒服多了。
2.兩位老朋友都係飛機癡，逢「新機落地」都必買飛趁熱鬧。 787給他們的印象：「機艙好安靜（指無雜音，一機記者邊可能靜？）令機艙廣播他們聽得好清楚。」
3.商務艙座椅不算太豪華，不過機艙空間同樓底都高了，濕度提高，壓力又減低，大家 瞓得好舒服。
4.個 787忌廉曲奇裏面混有碎果仁。
5.機窗比平時的大了 3成，且只要按掣，四十零秒就可令機窗由透明變成最深色，阻擋紫外線！好好玩！唔知會唔會好快俾人玩壞呢？
今年 11月，廣島及鄰近 5個縣一齊發行了 3,000組 Mazda歷史限量郵票，將 Mazda經典/概念車款一口氣列出，由早期在日本上市的三輪卡車，到 2010年上市的全新 Mazda5一口氣列出，每張面額 80日圓，但係日本人先買得，幾矜貴。
Travel Memo持特區護照或 BNO免簽證。日本領事館： 2522 1184
即日起至明年 4月 20日，乘 ANA航空，經日本羽田機場往廣島連兩晚住宿套票，二人同行每位$5,830起。
從羽田機場乘國內線往廣島約 1小時 20分。
查詢：
http://www.anaskyholiday.com.hk
110V，兩扁腳插座
100日圓約兌 10.3港元（文中價錢已折算港元）
下周天晴 15-24℃
■現在水邊雖只得三兩株山楓變紅，但已經好搶眼！
作者:
藍月亮
時間:
2011-10-28 19:07
現今的小朋友好幸福
歡迎光臨 小花俠論壇 (http://disanna.com/)
Powered by Discuz! 7.2
