標題: Carol Rainbow「書」得起 [打印本頁]

---

作者: lwl2007    時間: 2011-11-13 12:38     標題: Carol Rainbow「書」得起

因為蠢，任由感性蓋過理性，16歲學生o靚模謝芷蕙（Cammi）的慾照撒網。曾幾何時，楊梓瑤（Carol）和胡心諾（Rainbow）因拍寫真而被指Cheap，當o靚模「尊名」愈貶愈Cheap，在另一平行時空下，她們可能已是高材生，好好的讀書。

擁有34E豐滿上圍的「浸大E神」Carol，去年「胸」襲寫真界，推出性感噴血寫真集，當中啜唧唧冰及塗白色太陽油的照片超激，但慘遭網友炮轟甫士意淫，成為一時熱話。


對於寫真戰掀起不少是非，甚至被網友轟「Cheap」，Carol坦言曾為此感不快：「到依家都未放得開，女仔嚟o架嘛！邊個鍾意畀人話呢？外人第一眼見你，只會留意你身材，冇留意其他嘢，我所做嘅嘢要畀其他人付出更多，真係好難用三言兩語表達，要用行動畀其他人睇到自己努力先得，但我一啲都唔Cheap。」但Carol坦言對「浸大E神」的稱號吃不消：「希望搣得甩呢個名。」雖然寫真集備受爭議，但反令Carol人氣急升，並一口氣連接幾部電影，豬籠入水！回顧過去一年，她坦言苦樂參半，但同時亦自覺幸運，並感激公司給予極多機會。


堅持讀到畢業

近日因慾照而哄動全城的16歲學生o靚模Cammi，被人肉大起底兼被追訪，Carol以o靚模前輩口脗強烈勸喻：「最緊要讀好書先，讀唔成書好難做出色藝人，依家好多藝人學歷唔錯，有學歷嘅話，容易理解同消化事情，無論對讀劇本或者對投入角色都有好大幫助，若然連基本資料搜集都唔識，點演都冇用，所以我依家堅持要讀到畢業為止。」


娛樂圈競爭大、壓力大，學生o靚模出身的Carol，絕對能體會箇中感受。為了減壓，Carol閒時畫畫素描，她說：「我中學時有修讀，仲試過成晚掛住畫畫唔瞓，其實我個人都幾自閉，成日收埋自己。」


不愛埋女人堆   

Carol又自爆害怕與女性工作：「我好驚同女性一齊做嘢，因為驚有Gossip（是非），有時又擔心自己嘅花邊新聞，令人哋點睇自己，但自從同林建明及鍾慧冰等前輩合作後，佢哋當我世姪女，大家好好傾。我係幾在意人哋點睇自己，可能同出身有關，其實我鍾意同男性共事，冇咁易斤斤計較。」


事業和學業甚有起色，但感情生活「捧蛋」，Carol表示今年情人節與舊愛甩拖後，至今仍形單影隻。她透露以往揀男友，首選不是圈中人，但現時將條件放寬：「以前一定唔揀圈中人，因為呢行係花花世界，男藝人身邊有太多誘惑，但依家又可以諗吓，因為佢哋明白我做緊乜，唔需要解釋太多，反而對圈外男友就要每個Job解釋一次。」


後記：無悔入行

雖然身材經常被評頭品足，寫真集又飽受批評，但Carol坦言沒有後悔成為學生o靚模：「後悔冇意思，做咗就無謂再諗，跟住落嚟要自己掌握條路。」


如今16歲的Cammi出了位，卻換來被人指指點點的代價。身為Cammi同門師姐的Rainbow，亦不禁慨嘆師妹因為蠢累事：「以我為例，自己做乜嘢都有一條底線，千祈唔好衝破呢條底線，如果我同男朋友拍拖，當然攬攬錫錫係冇問題，但自己一定唔會影鹹濕相，就算幾鍾意個男仔都係咁話，如果呢啲相流出，真係好醜怪！」


怕師妹睇唔開

當年，Rainbow只是17歲卜卜脆，甫入行便與方力申爆出桃色風波，物換星移，主角換上比她當年還細的Cammi，Rainbow說：「小方嗰件事真係唔想再提，Cammi只得16歲，心智仲未成熟。當呢件事發生後，我第一時間SMS佢，真係驚佢諗唔開。你知啦，一個16歲嘅女仔要面對咁大壓力，我真係驚佢睇唔開！」


歌仔都有得唱「會過去的從來不會倒退」，時間可撫平傷痛，作為過來人，Rainbow感受最深：「遇到呢啲事最好當然同屋企人、朋友傾，但傾咗都唔可以阻止到自己胡思亂想，時間先可以沖淡一切，希望大家真係可以畀多啲空間Cammi啦！始終Cammi真係好細個，如果我係佢，一定會帶個男朋友返屋企畀爹哋、媽咪識，等佢哋打定個底，令佢哋安心！」


男演員約出街

o靚模正名應解作少女模特兒，入行的大多已行成人禮，不要看Rainbow平日懵懵懂懂，早已抱着帶眼識人的宗旨，要宣告o靚模並非冇腦：「講真，大多o靚模都已經成年，佢哋好多都係20出頭，已經有思考獨立性，有頭腦去分析問題。我記得自己剛入行時，有個都幾出名嘅後生演員喺Facebook同我傾偈，又用甜言蜜語約我出街，我雖然都幾Buy呢個演員，但覺得好怪囉！點解佢無啦啦想約我出街呢？最後我都選擇冇理到佢！」


o靚模面世三年，由Angelababy和周秀娜的嶄露頭角，到現在的Cammi失去頭上光環，彷彿這個「尊名」愈來愈Cheap，如果Rainbow當日在十字街頭，重新再揀過，會選擇入行還是讀書？她說：「我會選擇讀好書先，因為出嚟工作先知道自己有咩不足，可惜依家覆水難收。但我唔後悔自己嘅決定，因為我真係好鍾意做Model，我依家要做嘅就係盡力搵錢，儲夠錢就讀大學，我想讀Fashion Design，之後就轉行。」


後記：選擇障礙

Rainbow有選擇障礙症，訪問當天，經理人問她影完相後想吃甚麼？她說：「雪糕？朱古力？糖水？定係……」想了半天仍未有答案，大概她選擇了雪糕後，還想着在另一平行時空下食朱古力呢！

                                                                                                                                            
Carol堅持要讀到大學畢業，裝備自己成為出色藝人。


                                                                                                              
Carol的寫真照超激，但被炮轟意淫。


                                                                                                              
Carol甩拖後已放寬擇偶條件。


                                                                                                              
曾被網友炮轟Cheap的Carol，坦言曾為此感到不快！


                                                                                                              

                                                                                                              
Rainbow努力儲錢入大學攻讀Fashion Design，密謀轉行。


                                                                                                              
Rainbow不欲再提起當年與小方的桃色風波。


                                                                                                              
Rainbow拒影鹹濕相，極其量只與男友攬攬錫錫。


                                                                                         

---

歡迎光臨 小花俠論壇 (http://disanna.com/)

Powered by Discuz! 7.2