標題: Ada第一胎小產 痛到喊 [打印本頁]

---

作者: lwl2007    時間: 2011-11-13 13:01     標題: Ada第一胎小產 痛到喊

蔡少芬（Ada）今年5月誕下9磅4巨B女楚兒，開心背後卻埋藏一段傷痛回憶！她前晚出席分享會時，自爆去年初曾經小產，幸得老公張晉支持走出陰霾，勇敢造人，把楚兒帶來世界！

人間有愛，Ada與老公張晉每提起愛女楚兒定必笑得樂開花，一家三口有個好家庭，這對模範夫婦幸福得令人羨慕！不過，在幸福背後，張氏夫婦去年卻埋藏一段傷痛經歷，原來在楚兒呱呱落地前，Ada曾為張家添喜，可惜腹中塊肉未能來到人間走一趟！

前晚Ada應廖啟智和陳敏兒夫婦的邀請，出席夫妻相處之道及湊小朋友的分享會。當大家以為Ada只是輕談淺唱湊小朋友的經歷時，萬料不到她卻親述一段令她留下烙印的回憶，她在台上說：「記得我結婚後每個月都有驗孕，真係好緊張！知道懷有第一胎之後，我即刻打畀老公報喜，可惜喺去年年初，大約係2、3月嘅時間，我最終小產！」


基因有問題心跳停頓

談到傷心處，Ada一直強忍淚水把流產過程細說一遍：「佗BB嗰3、4個月，我去做定期檢查，一Check之下，原來BB冇咗心跳，醫生同我講因為基因出現問題，所以最後小產。聽到消息之後，真係好難過！我同老公都有喊，好彩有老公支持我，同埋有神嘅支持，用咗兩個月時間休息同恢復，終於走出陰霾！」


走過人生最痛，Ada沒有因此放棄把生命延續，與張晉共同努力下，終於再有喜，正因為前一胎過分緊張，Ada對小生命處之泰然：「生楚兒真係冇之前咁緊張喇！因為我覺得呢個BB有神嘅守護，無論生佢定湊佢都好放鬆。」


分享會前，Ada在後台表示希望藉今次分享會，抒發自己跟丈夫相處及照顧小朋友的心路歷程：「生楚兒之後，你話我唔驚就假，楚兒點郁動我都會擔心，但唔會24小時睇實佢囉！我哋兩公婆會好輕鬆去湊！」因為有智叔夫婦一同出席，Ada見好友及台下觀眾有影皆雙，即撒嬌說：「如果我老公嚟埋就好喇！可惜佢喺內地拍緊戲！」

                                                                                                                                            
蔡少芬強忍淚水憶述一段鮮為人知的小產經歷。


                                                                                                              
蔡少芬一得閒便會親自湊女，絕不假手於人！

---

歡迎光臨 小花俠論壇 (http://disanna.com/)

Powered by Discuz! 7.2