標題: 阿叻謀住等做陳總二世 [打印本頁]

---

作者: lwl2007    時間: 2011-12-10 20:53     標題: 阿叻謀住等做陳總二世

無綫電視廣播業務總經理陳志雲昨日宣布已向無綫請辭，但否認明年4月離職及自組製作公司，只是想讀書深造，更隨時可能回歸！無綫新主陳國強好友陳百祥（阿叻）笑言恨做總經理，無綫開聲即到。

本報去年11月曾報道志雲將向無綫請辭，處理無綫與四大唱片公司的版稅爭拗後便功成身退，結果他昨晨九時半在外事部副總監曾醒明陪同下見傳媒，交代離職原因，他說：「離職計劃已有一段時間，我想心無旁鶩（錯讀為貸）學習新事物，實踐遊學計劃。（四月離職？）日子仲磋商緊，無綫准我休假，趁呢段時間去美國矽谷、拉斯維加斯訪問同交流。（準備自組公司？）冇呢個計劃！一直有其他機構向我招手，但若果我要重返電視圈，TVB係首選。（離職同梁乃鵬出任主席有關？）完全無關，梁博士係好領導。（同捲入涉貪案有關？）完全冇關，係兩件事。」昨晚7時40分，志雲收工坐七人車離開，對現場守候的記者表示再冇補充後便直駛往銅鑼灣富豪酒店。

方逸華曾挽留

至於將接替邵逸夫出任電視廣播主席的梁乃鵬，昨日亦有回應志雲離職，他說：「一直都有留佢，尋日都仲留緊，係今朝至落實。方逸華小姐都有留佢，我都好唔捨得，但讀書係佢理想，或者緣分到佢會返TVB呢！一定有位畀佢。（唔驚被人撬？）百分百保證，佢唔會去第二度。（佢應承你？）呢個好放心，絕對唔會呀！亦都唔係四月走。（搵唔到人選接任？）呢個世界冇話冇咗邊個唔得，冇咗我都得呀！（出面搵人定內部提升？）言之尚早！」


法拉未及反應

一直被傳與志雲不和的製作資源部總監樂易玲，對陳總請辭亦感可惜：「陳總出咗名係大師，個個有事都搵佢請教，離職對公司係可惜，對我哋都可惜，我會返公司了解。陳總離職係遺憾，但有高層走，更高層一定有安排。」被指是「志雲派」的陳法拉則坦言陳總請辭消息太突然：「我都係啱啱知，未反應得切，同佢共事多年，好多謝佢對公司嘅貢獻。TVB係大機構又係上市公司自有安排，所以唔擔心。」


另外，與無綫股東陳國強分屬老友的阿叻笑言恨坐陳總之位：「其實TVB邊個睇都得，真係搵我，我即坐！一人之下，萬人之上，求之不得！（入去要幫手救亡？）唔使呀？TVB四十幾年來冇輸過，講真，搵我除咗我都姓陳，真係睇唔到有咩理由！」此外，無綫金牌監製劉家豪及梅小青已於九月向無綫請辭，兩人將於明年三月過檔now。

                                                                                                                                            
志雲昨日在曾醒明陪同下見傳媒，交代離職詳情。


                                                                                                              
陳百祥笑言如無綫邀任總經理的話會即時答應。


                                                                                                              
樂易玲指志雲離職屬遺憾，但相信「更高層」自會有安排。


                                                                                                              
陳法拉奪獎後返港，自言剛收到消息，不知如何反應！


                                                                                                              
本報去年底已報道志雲劈炮的消息，結果一年後終落實。

---

歡迎光臨 小花俠論壇 (http://disanna.com/)

Powered by Discuz! 7.2