標題: 黎明有感遭強姦 誓捍衞貞操 [打印本頁]

---

作者: lwl2007    時間: 2011-12-12 16:04     標題: 黎明有感遭強姦 誓捍衞貞操

黎明前晚在個唱上直斥某報報道失實，令他有感被「強姦」，還在萬二名觀眾前，高呼「要捍衞我嘅貞操」，更開腔否認老婆樂基兒懷孕。

連開七場的《黎明Leon Xu紅館演唱會2011》昨日圓滿結束，適逢昨日是黎明（Leon）45歲生日，身為老婆的樂基兒，於8時45分由經理人陳善之陪同下到場。身穿黑皮褸襯碎花裙的她，腳踏三吋高踭鞋，以行動粉碎懷孕傳聞。


而Leon前晚繼續為個唱大唱大跳，吸引林家棟、黃柏高及胡定欣捧場，愛將JW及衞蘭（Janice）則擔任表演嘉賓。當黎明唱到《願你今夜別離去》時，被煙花嗆到甩嘴，事後他急急道歉：「唔好意思。」


期間，有深圳女歌迷向Leon發問：「可唔可以問敏感話題？」Leon笑說：「你係乜嘢人，就係乜思維，問乜嘢。」女歌迷說：「我剛剛做媽媽，不是要為難你，但我好想知道。」對於有傳樂基兒懷有三個月身孕，未有就傳聞開腔的Leon趁機澄清：「我告訴你沒有，這是百分百事實。」


接着Leon直斥該報道失實：「今日（即前日）睇某集團網上新聞，講我同樂基兒造人過程同搞嘢，我知道有新聞自由，但我都有言論自由。」Leon旋即金句王上身說：「有冇問過讀者係咪想睇同係咪真？唔係真就係強迫，如果係強迫就係非法男女行為，即係強姦，咁我一定要捍衞我嘅貞操。」說罷，全場歌迷拍爛手掌。


衞蘭甩拖發福

而發福不少的Janice自爆上月與外籍男友分手，拍拖僅一年，大感心痛，但幸有主在身邊：「同佢有好多預計唔到嘅嘢，大家需要嘅嘢同心境都唔同，冇緣分，呢啲冇得勉強。（有第三者？）唔係，好彩有主，如果唔係就會唔掂。」因她與前男友返同一教會，問到有否在教會碰面？Janice說：「冇見過，分手之後都冇聯絡同見面。」

                                                                                                                                           
Leon有感被失實報道強姦，故誓要捍衞貞操。


                                                                                                              
樂基兒現身撐場，賀老公45歲牛一。


                                                                                                              
JW繼續性感上陣擔任表演嘉賓。


                                                                                                              
Janice甩拖後發福不少，看來已平復失戀的傷痛。


                                                                                                              
內地女歌迷向Leon（中）求證是否將榮升爸爸。

---

歡迎光臨 小花俠論壇 (http://disanna.com/)

Powered by Discuz! 7.2