標題: 嘉穎靠實力稱帝：我唔送禮 [打印本頁]

---

作者: lwl2007    時間: 2011-12-12 16:15     標題: 嘉穎靠實力稱帝：我唔送禮

無綫小生鄭嘉穎5年前於噓聲中稱帝，名字與無綫高層樂易玲掛鈎；今時不同往日，嘉穎早前憑實力再度稱帝，得到全城熱烈祝賀，印證他那句：「我唔擦鞋亦唔送禮！」

記得5年前我攞視帝，自覺未夠資格，當年真係冇對手，公司惟有頒畀我！今次我攞嘅感覺好唔同，上次既開心又擔心，今次只有開心！最緊要唔只公司再頒呢個獎畀我，而係我得到觀眾到其他演員、監製支持！再一次重申，我冇用約去換獎，從來都冇，因為自己係不朋不黨嘅人！講到要多謝嘅人，真係有好多，除咗我阿媽，生命中最重要嘅人原來都係女人，電視圈就有3個，包括珍姐（曾勵珍）、樂小姐（樂易玲）同Amy姐（王心慰）！

樂小姐令我印象好深刻，當年我同陳豪一齊傾經理人合約，由樂小姐負責同我哋傾，我一直睇住佢點樣蛻變。我哋唔係好似出面講到咁夾，我哋嘅睇法好多時並唔一致，有好多意見唔相同嘅時候，我知佢一切都全為我哋好而出發，但我哋睇法唔一定一樣，未至於嗌交，亦毋須一定要認同佢，因為諗法唔同，所以就算佢係我老細、係我伯樂又好，我唔係成日都聽佢嘅說話！

好老實講，我同高層關係唔係特別好，亦唔係一個擦鞋嘅人！我擦過邊個嘅鞋？我唔擦鞋亦唔送禮，我諗大家見到我同樂小姐食飯係06年，係最後一次，因為嗰年有官司，嗰排實在有好多嘢要傾，但之後仲有冇影到我哋食飯？不過我都好多謝樂小姐，因為佢一路以嚟都照住我，總之佢仲喺TVB一日，你都唔會喺第二間電視台見到我，大家可以睇到我嘅立場係幾咁清晰，因為樂小姐，我先喺TVB，真係好感激佢！


幫助出碟止歌癮

記得當年樂小姐搞咗一隻《男人魅》嘅唱片，呢隻唱片對我嚟講都幾緊要，因為丟低唱歌好耐，唔記得去電台做訪問嘅感覺！因為呢隻碟，我06年先有機會出一隻新歌加精選，係一件令我期待咗好耐嘅事，起碼畀我過一過癮，真係好過冇！呢啲一切一切都係樂小姐幫我安排，係有好多部署！


鄭嘉穎Profile

年　齡：42歲

身　高：178cm

代表作：劇集《天幕下的戀人》、《怒火街頭》及《烈火雄心2》

獎　項：萬千星輝頒獎典禮：最佳男主角（2006年、2011年）

場地：Hair Corner

服裝：Beauty & Youth United Arrows


                                                                                                                                            
鄭嘉穎入行接近20年，今年終於大豐收，廣受大眾認同！


                                                                                                              
樂易玲一路「照住」嘉穎，開騷當然捧場。


                                                                                                              
嘉穎與胡杏兒稱王封后，齊齊抹走霉氣！


                                                                                                              
嘉穎甫士表情多多，發揮「Law霸」本色，原來都幾Chok。


                                                                                                              

                                                                                                              
嘉穎06年首度稱帝，令他又驚又喜。

---

歡迎光臨 小花俠論壇 (http://disanna.com/)

Powered by Discuz! 7.2