標題: Kay34歲牛一投訴老公得個殼 [打印本頁]

---

作者: lwl2007    時間: 2011-3-14 14:44     標題: Kay34歲牛一投訴老公得個殼

謝安琪昨日在工作中度過34歲生日，早前老公張繼聰生日未有送禮的她，笑指老公「報復」冇表示，只送電話殼便算數！
謝安琪（Kay）與張繼聰昨日分別出席慈善活動，謝安琪透露昨日是34歲生日，原本想帶同囝囝張瞻出席活動：「不過佢尋晚（前晚）去咗睇佢爸爸個音樂會，我出門口嗰陣佢都未起身！」

學做好媽媽

至於老公有否送生日禮物？她笑說：「可能佢報復，因為佢生日，我淨係幫佢捐咗啲錢去環保團體，都冇送嘢畀佢，所以佢諗住公平啲唔送嘢畀我。（慶祝？）做完嘢會返去食飯，之後又要再出去做嘢！（生日願望？）最近好多天災，希望大家平安。」

第三年擔任活動大使的Kay透露，平日亦會帶同囝囝做義工：「佢之前都有幫奧比斯表演過跳舞，成班小朋友跳《Nobody》，佢飾演結他手！」對於鄭伊健回應其「食屎論」時，指她應是經歷更多，她說：「多謝佢意見，人係要多啲學習，我都學習緊做個好歌手、好媽媽同好太太。」

另一邊廂的張繼聰，對於老婆「投訴」冇表示，他說：「我送咗個佢鍾意嗰啲公仔電話殼畀佢，不過佢話唔算數，咁我再諗吓啦！」他表示囝囝前晚亦有睇他的音樂會：「佢話好睇，不過問我點解唔除衫，可能佢睇慣阿Rain（韓國歌手）成日都除衫啦！」
                                                                                                                                             
34歲生日的謝安琪表示會與老公張繼聰食飯慶祝。

                                                                                                              

                                                                                                              
謝安琪行善不遺餘力，擊鼓振人心。

                                                                                                              
謝安琪爆囝囝做義工，表演跳《Nobody》。

---

歡迎光臨 小花俠論壇 (http://disanna.com/)

Powered by Discuz! 7.2