無綫鬧小生、花旦荒多時，昨日無綫在將軍澳電視城影晒冷相，除胡杏兒坐正做一姐，李詩韻、陳展鵬、陳智燊及金剛等二線竟被谷上一線企頭排！而余詠珊的心腹亦前途無限，除老公星煥公司老闆何哲圖愛將許廷鏗企頭排，曾任有線高層的余詠珊繼續對有線舊愛將黃翠如及梁嘉琪「疼愛有加」，令二人可遲來先上岸「水鬼升城隍」，位置比效忠無綫多年的「TVBuddy」王君馨、楊秀惠及呂慧儀還要靚。去年企頭排的王祖藍、李思捷、阮兆祥及胡定欣等，今年慘被掟到次排。而「更生人士」崔建邦由助導身份變回藝人，獲派企第二行。無綫老闆陳國強、行政主席梁乃鵬昨日親臨督師，被傳離巢的樂易玲更現身幫手嗌咪指揮企位。
提到企位，杏兒說：「OK啦！最緊要有得企。（唔見黃宗澤？）佢返內地工作。今日好開心、好有凝聚力，唔只一、二線，好多前輩都喺度，眾志成城話人知人強馬壯，厲害過台慶！（排位贏晒，衣着讓番？）唔係計排位，一姐係汪明荃，我係咪着得好保守？我忠於中性。」而陳法拉與陳國強及梁乃鵬密斟：「老闆問我開緊乜劇，梁博士成日睇我哋嘅戲，叫我畀心機。」李詩韻則說：「頭排好難企。（企得穩？）望係咁望，最想攞獎，提名好多年未攞過。」
樂易玲否認離巢
外事部副總監曾醒明被問到晒冷是否為爭奧運壯聲威，他說：「萬事俱備，等奧委會通知。余詠珊上任後有新氣象，港姐、紅白鬥不惜工本，今日為《玩轉三周1/2》拍嘢，係Amazing Summer重頭戲，因為喺電視城拍，戲劇組停廠配合，合照會整成2013月曆封面。」而陳國強補充：「唔係不惜工本，應使則使！（樂易玲離巢？）方逸華小姐仲係股東，樂小姐不嬲搞緊邵氏電影，傳佢去幫方小姐手唔成立。」
密實上陣的杏兒輸衫唔輸人，位置贏晒！
愛將
許廷鏗獲安排企頭排，地位勝過不少無綫藝員。
愛將
舊戰友梁嘉琪（左）與黃翠如貴為余詠珊愛將，企位靚自然開心！
「緋聞情侶」崔建邦與唐詩詠之間，竟多了個馬國明做電燈膽！
林峯擺出Chok甫，氹得身旁的陳法拉笑不停！
陳國強（左）與曾醒明齊齊為樂易玲澄清離巢傳聞。
陳國強以行動支持，可見余詠珊非常得寵！
無綫藝員及高層大晒冷，老闆陳國強親自統帥，誰人得寵「一眼」睇得出！