小花俠論壇 - Powered by Discuz! Board

標題: Tom@Mr.遊日斷正焗認戀Leanne [打印本頁]

作者: lwl2007 時間: 2011-8-5 20:02 標題: Tom@Mr.遊日斷正焗認戀Leanne

「陽光妹」何思諺（Leanne）被指介入Mr.鼓手Tom與口靚模蔡穎恩的戀情，導致二人分手，雖然Tom死口唔認與她撻着，卻被拍得在日本鬼祟拍拖歎壽司，鐵證如山下，二人昨日焗認拍拖！

舊八模成員蔡穎恩（Evelyn）傳因死黨Leanne介入而與Mr.鼓手Tom分手，但Tom一直矢口否認與Leanne撻着，令這段三角關係更撲朔迷離！不過，昨日有讀者爆料，圖文並茂力證Tom與Leanne拍拖遊日本，同行還有Mr.拍檔Ronny及其長髮女友，可見二人的關係在Mr.中已是公開秘密！照片所見，一行四人在東京築地歎壽司，頭耷耷的Leanne點菜時讓男友話事，十足小鳥依人，而她的漁夫帽與5月開工時所戴的是同一頂，可謂鐵證如山！

澄清絕非「小三」

本報記者昨日致電Leanne，得悉拍拖斷正，她不得不公開戀情：「其實都係開心去旅行，我哋一直想喺適當時候公開，但近排有太多負面新聞，所以唔公開住，依家既然畀人影到，惟有承認啦！」她很介意被冠以「小三」之名，並主動澄清：「我同Evelyn仲係好朋友，我唔係第三者，呢件事我哋三個人最清楚，總之Tom同Evelyn分手唔係因為我介入！」她透露與Tom開始了1個月，感情穩定，其後還在微博吐心聲：「感到恩惠（欣慰）是明白我的人，一直都在愛着我，謝謝你們。」

與Evelyn仍是朋友

至於Tom接受電話訪問時亦焗認拍拖，並透露是次日本之旅共5天，而Leanne是第3天加入：「畀人影到就認咗佢，總之Leanne唔係第三者，係兩個月前拍MV認識，依家拍咗1個月，但我同Evelyn已經分開3、4個月。Leanne唔係小三，我想保護個女仔，好清楚自己諗乜，唔會亂嚟！」問到為何之前又否認？他說：「我哋啱啱一齊，同Evelyn冇刻意交代，亦冇同佢溝通公開，所以唔認囉！」他強調Leanne與Evelyn的友誼與爭仔無關，而他亦與Evelyn保持聯絡，問到此行是否與Evelyn同房，他即說：「夠喇！」

至於同遊日本的Ronny，昨日與另一拍檔MJ出席活動，事後MJ說：「我知Tom同Ronny去日本，但唔知帶埋女友！」至於是否早知Tom與Leanne拍拖，他小心地說：「唔知呀！如果畀人影到咪認囉！祝佢哋友誼永固。」

Leanne承認與Tom撻着一個月，但絕非「小三」。

歡迎光臨小花俠論壇 (http://disanna.com/)