如何處理升職後的難題？

didi

無論任何情況下升職，都唔係開心上位從此就可以開心快樂地生活下去。升職，會遇到各種問題，仲需要技巧去面對！
人際管理
難題1：面對職級比你低的人
升職最常遇到嘅問題，係人際關係！最常見嘅係你升咗職，但以前跟你平起平坐，甚至職位本來比你高嘅人，其職位而家都比你低，佢哋會睇唔過眼、唔忿氣，甚至想你衰。你可以點做？
傳統上，有啲人覺得新官上任，一定要鞏固自己嘅勢力，所以會先排除一啲「異己」，即係炒一啲人，然後再請過一批新人嚟填補，一來來個下馬威，二來方便掌握自己嘅班底，令自己工作起來更方便。呢個係快刀斬亂麻嘅方法。
如果你唔係升上一個極高級嘅位置，公司亦未必有資源俾你如此大費周章，喺呢種情況下你就要花點努力，細心部署。
• 首先，你要快速認清邊個支持你？邊個想你衰？因為呢啲人除咗會影響你嘅工作情緒，仲會影響你嘅工作表現，所以你一定要分清，邊個可以幫你順利完成工作，邊個會跟你搗蛋作對。
• 然後，你要搞清楚唔支持你嘅人點解唔支持你。如果佢哋純粹因為眼紅，呢類人其實可以不理，你只要按本子辦事，慢慢地佢哋就會接受你比佢高級嘅事實，毋須太理會佢哋嘅感受。
如果佢哋唔信任你，認為你資歷淺，未必俾到好處佢哋，你只要做到對外會撐佢哋呢一點，佢哋會好歡迎你坐上呢個位。通常呢類人唔會要求好大嘅著數，如果你做得到，又可確立你嘅地位，何樂而不為？
•至於你自己，更加要調整好自己嘅心理狀態。你剛坐上呢個位，想以成績嚟證明自己嘅實力，仲需要唔少時間，不過你還是可以提升個人心理質素，令自己睇起嚟更有說服力！例如觀察你上級嘅言談舉止、打扮、主持會議嘅技巧，令自己睇起嚟有管理層嘅style，投入角色，起碼輸人唔輸陣。不過切記唔好一下子完全改變形象，要循序漸進subtle一啲，唔好令人有「扮晒嘢」嘅錯覺。
難題2：面對現在跟你平起平坐的人
你原本比佢哋低級，而家一躍而上，同佢哋平起平坐，必定會產生一陣尷尬，因為佢哋覺得你資歷淺，甚至可能唔將你放在眼內，處處搵你著數。喺呢一點上，你不得不承認你資歷的確係比佢哋淺，你不妨喺公事上問下佢哋嘅意見，等佢哋有被尊重嘅感覺，同時可減低佢哋對你嘅戒心。假以時日，再用成績去證明自己嘅實力，可能你好快就可以超越佢哋喇！