辦公室6大抽水懸案

didi

「喂！你唔好嚟乘機抽水喎！」朋友之間抽來也抽去，嘻嘻哈哈圍威喂是樂趣；而在職場上，眼巴巴看著自己棉乾絮濕捱大個仔，被人抽水抽到是人地親生一樣，固然不爽。
偏偏當事人連喊一聲「你唔好又嚟抽水」的資格都沒有，因為一旦說出口，開口的人就一定是太小家、太不識大體。

根據香港網絡大典，「抽水」定義泛指以不同手段使原本不屬於自己的利益屬於自己。符合上述定義的「假人假事」多不勝數，6大常見抽水位如下︰

開會抽︰
在公司大會上，銷售部門主管阿爺報告成果︰「今個月營業額升咗23%。因為……（下刪8萬字）。」庶務部水哥搶白︰「認同，我地今個月亦每人派多一格廁紙，相信都大大加強咗同事士氣同跑數能力。」

食飯抽︰
水姐一臉誠懇問︰「講開先講丫，見你平時同Mary有講有笑，你覺得你阿姐Mary份人點？做唔做到嘢？」
無論當事人讚Mary還是遊花園，水姐都會以6000分貝大肆張揚︰「呢個阿妹好得人驚，周圍唱佢阿姐唔掂。」

開工抽︰
「有咩可以幫你？」抽香主動幫忙，對孤軍作戰的Richard來說猶如荒漠甘露。Richard感激不盡，一邊交付簡易工作，一邊計劃要請「咁抵得諗」的抽香慶功。第二天領功大會上，大老闆說︰「Richard，多得抽香幫你，如果唔係工程未必咁順利呀~可~」係~囉~可~

收工抽︰
晚上9點14分，小師妹在辦公室飲泣趕報告，英雄抽官保護主義作崇，撲到小師妹面前問︰「好多嘢做？咁夜返屋企好危險。」小師妹哽咽︰「聽…聽…聽日交唔到rererereport俾人炒都似……如如果有人幫手就好……」「得，我搞掂，你走先。」第二日，老闆歌頌小師妹的豐功偉績，小師妹對抽官的仗義卻隻字不提。

Email抽︰
「Dear抽生,
Kindly have a look at the attached report and feel free to comment.」

「Hi Lulu,
pls find my comments below……」（又下刪千字）反正內容不重要，最重要的是抽生「鑑生」將老闆加入「cc」（副本抄送）欄。

facebook抽︰
Daisy 10年不放一次假，難得請假度蜜月，強迫症式將登機屏相片po上facebook，加一句「出發~」老抽2秒留言︰「玩得開心啲！mafan company ms fan啱啱打嚟投訴你張單出貨有問題。放心，我唔做自己嘢都幫你死掂佢。」留言一出，上至老闆、下至茶水，都不是按讚，就是留言︰「老抽~ 辛苦了！」

防抽水頭盔
基本上，抽水這回事是防不勝防的，情況就像颱風尤特走的時候，兩小時內趕回公司處理兩小時公事，始終會被淋濕一樣。不過，為免變成落湯雞，雨褸、雨傘、頭盔還是有的︰
1/ 公事切勿假手於人
2/ 切忌盲目接受他人「好意」
3/ 千萬別搬弄是非
4/ facebook切勿曬命
5/ 必要時一句「Thank you for your kind comments」、「多謝指教」、「大家咁話」、「跟你學嘢」了結話題

一句講晒︰無論做事還是做人，心態最重要，人家要抽水搶風頭就由他，反正人在做天在看，就當是磨練，自我人格升呢。