由內靚到外！7招助你改善失眠

didi

講起失眠，你可能會即時諗起黑眼圈。但事實上，長期唔夠瞓會影響情緒，輕則脾氣暴躁，重則會增加患上糖尿病、高血壓同抑鬱症嘅機會。所以，如果你想內在美與外在美兼備，就絕對唔可以忽視失眠嘅問題！
咁點先為之失眠？如果你難以入睡、睡眠斷斷續續，導致睡眠質素差而影響生活，咁就係失眠。

成日話瞓之前飲熱鮮奶、又或者點香薰可以改善失眠，到底係咪架呢？其實呢兩個方法都係因人而異，如果你想試，可以睡前飲300-400ml熱鮮奶，又或者睡前於耳背、手腕位置搽少少薰衣草香薰 / 在房間燃點，不過講到最好的方法，應該係：
1.作息要定時，而且無論前一晚嘅睡眠質素係點，每日都應該定時起身，亦不應瞓晏覺。
2.由於咖啡、茶及能量飲品含有咖啡因，所以少飲為妙。
3.睡前一至兩小時飲少量酒精（不多於兩杯）可令人放鬆，但要切記不能多飲，因為飲太多酒會減少深層睡眠！
4.臨瞓前沖個暖水涼，可以紓緩神經。
5.電腦屏幕釋放嘅藍光會令腦電波活躍，而輕觸式智能手機所釋放嘅藍光仲強過電腦，所以睡前一至兩小時，就唔好玩電腦 / 電話喇。
6.睡前不宜打機、睇恐怖片、諗公事或工作，亦唔應該做劇烈運動，好似跑步、舉重或打籃球，如果要做，就要喺睡前至少兩小時進行。
7.睡前最好有一段時間唔做任何嘢，等自己好好放鬆。

TEXT : 韋寶 SPECIAL THANKS TO: 張國明醫生