辦公室8大討厭行為！

didi

唔想喺公司犯眾憎變「孤獨精」，就要注意以下嘅事項喇！

1.嚇人 / 騷擾人
如果人哋好專心咁做緊嘢，你突然間喺後面「嘩」一聲嚇人，又或者响人哋附近勁傾閒偈，都係好騷擾嘅事。曾經聽過有人趁同事去緊廁所，將一塊整濕咗嘅抹手紙從高空掉進廁格中，事後嗰個人仲周圍同人講好好玩！

2.亂搞同事枱上的東西
有時見到人哋枱面啲嘢幾得意，就伸手去拎嚟睇，睇完又唔擺返原位，甚至整爛咗，想人哋唔嬲都幾難啦！
其實無問過人，已經唔應該拎人啲嘢嚟睇；如果人哋肯俾你睇，都應該要將物品放回原位。

3.食晒公家零食
曾經有人為咗慳錢，將公家零食當飯食，結果8成零食都俾佢食晒！搞到大家都唔鍾意佢，仲夾計將所有零食收埋，唔再放喺公家位置！

4.衛生零分
試過有人將鼻涕廁紙放晒喺枱面，久久都唔清理，搞到每個人經過佢個位都會加緊腳步！仲有，有病尤其係傷風咳 / 感冒，都應該戴口罩！

5.是非當人情
如果你成日周圍八，然後將人哋啲私事講出去，想有人鍾意你都幾難。

6.喺pantry洗私人物品
當人人喺pantry洗杯、洗飯盒，你就唔好喺度洗抹枱布、換花樽水，當然，洗腳呢啲就更加恐怖了！（唔係講笑，舊公司真係有人咁做！）

7.任意調較冷氣
當天氣凍，就將冷氣溫度調高，甚至將冷氣關掉，搞到公司焗過焗爐；又或者，喺夏天將冷氣調低至十四、十五度，唔環保之餘，仲搞到公司好似雪房咁。
即係咁，你個位熱就帶把風扇仔返嚟，唔夠暖就著多件衫！

8.隨意拎雪櫃內的東西
公司唔係你屋企，唔係打開雪櫃見到乜都可以拎嚟食 / 拎嚟飲，就算係一盒鮮奶都好，唔係你嘅就唔好拎嚟飲，因為同事係真金白銀自己買返嚟，你咁做同偷嘢無分別！