勁過 AKB 148女僕 say：主人 - 日本東京

Maid Café已經睇得夠多了。但係 148個女僕守喺你家門口齊喊：「主人歡迎回來！」問你點算？全秋葉原的最 MaidCafé，就晒冷有 148個女僕， 148呀，真係勁過 AKB48，質素？唏， AKB都唔係個個掂啦！然後全日本首家 BL Café（即是BOY’ S LOVE，男男之戀）也落戶秋葉原，網頁寫他們會在店裏「 Do this and sothat」。毒男與腐女，日本人真係乜都諗得出！

秋葉原最大　足六層高

■兩位兔耳女僕，用魔法送上我的漫畫蛋包飯！

AKB48在秋葉原車站旁，高達咖啡廳旁開了新劇場同咖啡店，你有 48個，這裏有 148個 Maid！雖然分不同時段上班，但繁忙時段六層加埋都少說有60個女僕通店走，而且質素都唔差喎！女僕們還有多個組合，拍MV、寫真、出唱片，不時仲有演唱會、簽名會、萌之猜拳會之類，贏了就可以去扭蛋機扭禮物。說的正是大樓由 4樓起到 9樓6層的@Home，每層有不同主題。這一層是日式秋楓情懷、下一層是高八度甜蜜女僕貓耳，以及 Cosplay格等，還有頂樓「華」活動室，同8樓的唐詰訶德，售賣Maid們產品的商店。貓咪笑起來嗲到暈，明日香叉起腰係咁鬧客笨蛋（但個客好鬼開心喎），舞台上篷篷短裙仔的「絕對領域」（大髀裙腳位）點跳都不走光。點了個蛋包飯，例牌地兩個兔耳Maid跑來「用番茄醬畫你個樣」（點畫都係豆豉眼），仲有「將愛心魔法注入小蛋糕」的超長咒語。雞皮。但到我話要拍片，眾女閃着星星眼勁興奮地問「真的？好厲害！好緊張哦！」簡單、率真與幻想（我理佢真定假吖！），少少嘢就捧到我滿天星星同光環，成個星探咁！回想自己當時有點尷尬又略飄的表情，大抵跟旁邊魂遊男差不多吧。

■ 4樓每次送上餐點都送上「 Love Love」 Thanks God個個都飲得杯落。

■客人們都扮晒嘢，來得好有誠意㗎！

■小熊貓蛋糕出乎意料地好吃，約$60

■ びびよびよびよひよこさんライス蛋包飯約$110

@HOME
地址：東京都千代田區外神田 1-11-4,ミツワビル 4F-7F
電話：（ 81） 3-5294 7707　交通：秋葉原站電器街口左轉走約 2分鐘
網頁：http://www.cafe-athome.com

絕叫!!曖昧 BL Café

當我話去 BLCafé，組裏唯一男同事抱頭勁喊：「咁重口味？」但個樣勁興奮囉！話說若秋葉原係宅男天下，池袋就係腐女的世界。但世界變，秋葉原的腐女風潮已然急漲，由池袋搬到秋葉原的執事 Café Miracle Jump，現在還變身賣埋寫真集的索爆偽娘Café，為本就多花臣的秋葉原注入新血。這幾天都下雨，店裏比較靜，只遇到兩位少女客人。男孩們朋友以上的曖昧同親密，是BL的妄想核心，所以屬性好緊要。同鬚根店長泰一影相，佢擺個大眼可愛Pose，嘩！嚇得我呀！吧枱有人點菜，兩位學生樣的服務生忽然坐出梳化，挨在一起又似錫到捉住雙手在搖cocktail。「呀~~！」，包括我，即刻舉機影相！但身手敏捷的店長即飛身過來為客人們擋駕：「不能騷擾客人。」突然又即刻Man晒。其實服務生們平時只要角色扮演，親密吓，拖吓手或眉來眼去吓，已足夠引發腐女們的妄想。店長：「好多都係隱性腐女，現在的BL漫對性描繪都好「明刀明槍」，女仔始終怕羞，要遇上同好，甚至和男生談論BL談何容易？這個酒吧就提供了這樣的地方讓她們相聚。」酒吧裏有純情至超激BL漫任睇，除了八位三次元服務生外，還有八位二次元帥哥服務生。腹黑、傲嬌、體育、正太、眼鏡，一一貼在牆上擺晒 Pose。「但，佢哋點Serve我呢？」店長：「佢哋，咪企咗喺度囉！」然後餐牌、筷子套同紙巾都有佢哋嘜頭，首名成員「野中直哉」工作日記（漫畫）已經開售，同你分享店中工作妄想點滴，你仲想要咩服務？吓？哦。

■扮 Chok的店長泰一展示八位二次元服務生及菜牌。

■出現啦！必殺二人兩手 Cocktail！

■八位二次元靚仔給你介紹菜牌。

■ Teppei推薦手上的兄弟 BL漫，說兄弟愛好可愛。

Miracle Jump
地址：東京都千代田區外神田 3-2-11遠藤大廈 3F
電話：（ 81） 3-3251 8013交通：秋葉原站電器街出口走約 5分鐘
網頁：http://www.miraclejump.com

幪面超人入廚樂

■幪面超人晒冷！

你是幪面超人 Fans嗎？你想戴着各代超人變身腰帶，一騎他的愛驅馳騁嗎？池袋就有家 Kamen Rider讓你如願。去到PASERA池袋本店，走「變身樓梯」擺個 Pose，你就進入了秘密結社的大本營！好多中年Fans一入來就衝了去歷代幪面超人的變身腰帶同工具櫃裏借道具，身心同時變身！仲可以去櫃枱借Ank隻手同披風，做埋奸角走上撒旦幫皇座影相。至於食物味道嘛……你幾時見過幪面超人入廚同食飯吖！個飯，咪就係一眼睇晒漢堡當係眼，兩條生辣椒做角，生菜下收埋隻蛋，配番茄醬同桌上醬油任倒。若非影相實喊回水！相反隻神秘嘰嘰怪係墨汁芝士意大利飯，好細碟食唔飽，但溝得香濃味美！而且甜品做得非常有誠意，如黑牛、抹茶大福、刨冰等每款都弄成不同年代的幪面超人樣，仲調得幾好味！

■ SKY朱古力黑牛約$63

■幪面超人 1號漢堡飯約$93

Kamen Rider the Diner
地址：東京豊島區西池袋 1-21-9， PASERA池袋本店 4Ｆ
電話：（ 81） 120-02 5296交通： JR池袋站西口行約 2分鐘
網頁：http://www.paselabo.tv/rider/

Travel Memo

持BNO護照或特區護照均免簽證。日本領事館： 2522 1184東京香格里拉酒店 WISH for Japan套餐連二人早餐、免費Wi-Fi及使用健身室，房價 10%撥捐災區幫助災民， DeluxeRoom每晚約$4,344起。查詢：http://www.shangri-la.com

1港元約兌 10.3日圓
110V，兩扁腳插座

由即日起至 12月 15日前訂購香港至東京經濟客位機票，連兩晚東京酒店住宿，票價由$2,680起。國泰假期：http://www.cxholidays.com　　

下周天陰， 16℃至 23℃

返回列表

勁過 AKB 148女僕 say：主人 - 日本東京

[收藏此主題] [關注此主題的新回復]

[通過 QQ、MSN 分享給朋友]