林峯聞BB冧住唱

lwl2007

「Chok王」林峯的演唱會圓滿結束，繼吳千語和陳嘉桓後，另一緋聞女友葉璇前晚現身支持，實行一場一「女友」！嘉賓謝安琪亦忍不住笑他：「唔知BB喺唔喺度？」阿峯聞言不但沒有黑面，更露出一副冧樣。

奪《勁歌》最受歡迎男歌星的林峯的一連三場《瑞士依波路表矚目呈獻：A TIME 4 YOU演唱會》前晚在紅館圓滿結束。謝天華、黃百鳴、丁子高、苗僑偉夫婦、岑麗香、苟芸慧及朱晨麗等均有捧場。阿峯大玩一場一「女友」，除了頭場的吳千語，第二場的陳嘉桓外，曾傳緋聞的葉璇亦在尾場現身睇騷，並獲安排坐VIP區。

擔任嘉賓的謝安琪（Kay）除了與阿峯合唱冧歌外，更以其緋聞開玩笑：「唔知BB喺唔喺度？」 全場觀眾聞言即時起哄，阿峯聽後冧爆甜笑說：「全場好多人抱BB，都係Honey！」而另一嘉賓林欣彤前晚出場時，阿峯和全場觀眾予以掌聲鼓勵。

尾段時，阿峯High爆離台，走到控制台邊Chok型仔樣邊唱歌，令歌迷瘋狂地圍住他不停拍照。完騷後，觀眾似意猶未盡，阿峯兩度Encore，並與演唱會監製鄧智偉合唱，再向台下派飛吻，粉絲才於接近凌晨12時離開。

對於被Kay取笑，阿峯於騷後受訪說：「綵排時有問過我，自己唔介意，而且幾好笑。」記者取笑他當時一副冧樣，他即笑說：「唔通喊咩？」問到是否已默認吳千語是「BB」及雙方關係？他即時投降：「唔知呀，唔好問，都係你哋寫。」

鍾嘉欣讚郎才女貌

另外，鍾嘉欣前晚出席劇集《巨輪》的收工飯局，故未能到場支持開騷的好友林峯，提到阿峯的新歌《BB》及其緋聞，她說：「我唔八卦人哋嘅嘢，如果係真就祝福，佢都係時候拍拖啦，郎才女貌都襯o架！」而曾與她合作的鄭伊健與蒙嘉慧前日結婚，她大讚兩人是天造地設，望他們早日生仔。

                                                                                                                                                                                                                             
謝安琪在台上取笑林峯，全場立即起哄！

                                                                                                                                                                    
林峯走到台下親近粉絲，險被扯甩褲！

                                                                                                                                                                    
阿峯的前緋聞女友葉璇（右）獲安排坐VIP區。

                                                                                                                                                                    
無綫一眾女藝員齊齊到場欣賞阿峯演出。

                                                                                                                                                                    
鍾嘉欣叮囑阿峯要早日拍拖。

                                                                                                                                                                    
林峯順利完成三場演唱會，可喜可賀！