鱔魚當造營養健康

綿羊

鱔魚當造營養健康 周 中

鱔魚當造營養健康 休漁期一過，市面上海鮮慢慢開始變多。呢個時期嘅當造海鮮之一就非鱔魚莫屬，一到夏天鱔魚肉最為細嫩美味，營養最豐富。鱔魚補虛益血，適量食用可以祛頭風、醒腦提神。古時候江湖郞中常備嘅“大力丸”，主要配方之一就係鱔魚，聽講食咗有利筋骨功效。 宜家市面上就數黃鱔、門鱔同白鱔最為常見。鱔魚做法多多，用黃鱔舉例，鱔魚頭營養十足，可以用來燉湯：先將黃鱔頭洗淨然後飛水，瘦肉洗淨，葛根用滾水浸十分鐘；跟住將瘦肉同葛根一齊入煲加水，大火煲半個鐘之後落黃鱔頭，轉文火燉三至四個鐘頭，一道瘦肉鱔頭湯就大功吿成，做法唔難不過需時就長啲。呢道湯口感好，新鮮中帶有清甜甘潤嘅味道，而且有涼血清熱、降火排毒功效，夏天飮就最啱。黃鱔魚肉可以切件，同蒜子、香菇、茭白一齊入煲炆扣，整成香菇茭白鱔魚煲。魚肉吸收香菇同茭白筍嘅精華，特別鮮香，成道餸有魚有菜，夠晒營養健康，用來送飯一流。或者將鱔魚肉刴碎整成鱔球都得，煮個豉汁蒸鱔球同樣好味，仲清淡有益。 夏日炎炎人嘅口味就容易變刁鑽，呢個鱔魚餐老周都整過幾次，確實啱夏天食。為買餸煮飯而煩惱嘅家庭主夫主婦不妨一試！