XO醬煮餸冶味
宜家提起XO醬，相信大家都唔會覺得陌生。其實XO醬喺九十年代先開始普及，但因為味道好、煮餸易搭配，所以十幾年間就遍及全球中華料理界。XO醬材料通常包括瑤柱、蝦米、火腿、辣椒等，但就冇固定標準，聽講澳洲華人仲會用三文魚代替瑤柱同蝦米來製造。不過無論用咩材料，最終製作出來嘅醬料都有一個共同特點，就係鮮中帶辣。 覺得口淡淡嘅時候不妨用XO醬整番幾味，好似老周我有時就會喺屋企煮個XO醬炒帶子，又鮮又香，送飯食最過癮。做法都唔會太複雜：首先將四季豆切頭去尾、切段，汆水三分鐘後放入凍水冷卻；然後將帶子汆水一分半鐘，瀝乾水，用鹽、胡椒粉同紹酒拌匀醃製。跟住燒熱油鑊，用大火將帶子兩面輕輕煎成淡黃色，每面大約兩分鐘，裝起。之後落蒜茸爆香，落四季豆快手炒匀。等四季豆炒到軟身之後，就係主角XO 醬同帶子出場喇，倒入鍋中一齊炒，咁就搞掂。帶子口感夠鮮，再加上冶味嘅XO醬增添香辣，正！記住炒菜嘅時候唔好過火過稔，留少少脆口質感，更加好味。 除咗帶子之外，XO醬炒高麗菜、生菜、大白菜都同樣好味，炒肉類同海鮮都得，好百搭架。有時一個人食懶得煮飯，仲可以用XO醬撈個即食麵當一餐；雖然營養普通，不過勝在慳水慳力又好味，偶然為之都不為過！
| 
