生果入饌益處多
就快到中秋，時令生果已經大批上市。生果除咗用來做飯後點心，仲可以攞嚟入饌煮餸；不但營養健康，味道仲十分清新可口添。首先生果係一種唔錯嘅煲湯材料，可以煮出清潤有益嘅湯水。例如木瓜煮魚、蘋果燉無花果都係常見嘅生果湯；仲有較少人嘗試嘅哈密瓜，用來煲響螺或者雞肉都好好味。生果用來炒餸都係一個好選擇，味道清爽，例如水晶梨用來炒蝦球、帶子呢啲海鮮，杧果用來炒牛肉。記住開炒之前將生果去皮，用鹽水浸泡，再用熱水浸熱，炒熟海鮮同肉類材料之後再落生果。千祈唔好將生果生炒，咁樣會將生果炒到散晒兼冇味。 生果仲有最簡單入饌做法，就係整成沙律，除咗常見嘅蘋果沙律、香蕉沙律，仲可以整個柚子沙律，買個沙田柚加少少果醋，都幾特別。 生果富含維他命，對身體有益，所謂一日一蘋果，醫生遠離我就係呢個意思。不過，有益歸有益，都唔可以食過量，尤其體質太寒嘅朋友更要注意。仲有減肥嘅愛美人士，食生果餐之餘都要補充蛋白質，淨係食生果容易越食越虛，咁樣減肥就唔健康喇。 講開又講，有個生果偏方就萬試萬靈。有位老友成日咳，連食幾日燉橙冇食藥，咳嗽居然自動痊癒，眞係好神奇。聽講燉橙時加少少鹽效果會更好，平時有咳嗽毛病嘅話，不妨試佢一試！
| 
