秋天食秋葵有益
呢幾日陰天又降溫，感冒唔經唔覺開始“流行”。一到轉季，人嘅抵抗力就會降低，天氣涼除咗要留意添衣之外，仲要注重均衡飮食，正所謂“藥補不如食補”嘛。 上一期同大家推介咗唔少秋季靚食材，今次仲想介紹吓正當新鮮嘅秋葵。咪睇秋葵個樣平平無奇，其實佢喺台灣同日本都係熱門暢銷蔬菜，不但富含膳食纖維同維他命C，仲含有果膠同牛乳聚糖等成分，定期食用可以幫助消化、健胃整腸，仲可以緩解胃炎同胃潰瘍口添，可以話啱晒日夜繁忙嘅返工一族喇。秋葵口感軟稔，甜滑又多汁，旣可以白灼涼拌，又可以熱炒同燉湯，整成沙律或者榨汁都好好味。平時喺屋企貪方便可以蒸個秋葵來食，落少少豉油同蒜頭調味就得，健康又可送飯。仲可以炒個秋葵肉片，做法好簡單：將切好嘅肉片加鹽、料酒同生抽一齊醃幾分鐘；跟住將秋葵用滾水淥一淥，切成小段、小米椒切段備用；炒肉片至變色之後加入秋葵同小米椒炒熟，咁就大功吿成。或者整個番茄炒秋葵都得，酸酸甜甜同樣好味道，而且唔怕油膩口添。 除咗蔬菜之外，湯湯水水都差唔多要出場喇。有時間可以買返啲豆類同根莖類食材一齊煲湯，例如綠豆、白蘿蔔、蓮藕等等。如果嫌煲湯太麻煩，仲可以煮啲蘋果雪梨湯當茶水飮，可以清潤止咳。不過俗語說：生命在於運動，除咗食補之外，仲要多做運動，咁樣強身健體先至有保證嘛！ | 
