幽一默？唔難！

chan200308

笑一笑，世界更美妙。有時犯錯在所難免，不過只要肯認錯、再加兩錢心思，補鑊都可以補得有誠意一點！

揀另一半，薄荷糖最唔鍾意高富帥，大搖大擺call齊傳媒送跑車、做騷當浪漫固然令人毛管戙；就算你只係小康之家，日日同薄荷糖講股票、金融、炒樓，都咪駛旨意我會動心。過得人世嘅，對自己好當然最重要，而最難抗拒嘅就係識得玩幽默，幽自己一默又好、黑色幽默都唔錯，喺香港生活已經好難頂，識得苦中作樂先可以挨一世，係唔係？

所以唔怪得外國人受香港女仔歡迎，起碼唔會板板六十四，玩幽默玩得出神入化。好似早排冬奧開幕式，奧運五環慘變四環，當大家都笑佢哋準備工夫唔多夠嘅時候，主辦國俄羅斯竟然幽默幽到底，於閉幕禮上再現「四環」，補飛又好、自嘲又好，未打開嘅第五環都乖乖哋開返，大家笑下之餘都會用力鼓掌，起碼你知衰得嚟又肯補鑊。

早兩日又有一單，有狼隊球迷開開心心去官網購物、買咗件波衫，點知送貨時見到波衫個隊徽上下倒轉，呢件錯體波衫雖然一定價值連城、隨時炒得起，不過個球迷就真係唔知好嬲定好笑…事後會方向呢位球迷贈送免費門票道歉，不過爆趣嘅事情就出現了！因為狼隊幽自己一默，連道歉信都係上下倒轉嘅，搞笑之餘其實都係知衰嘅表現。

所以話呢，香港人太緊張喇，其實好多事情都可以轉個角度，幽一默就可以淡化，唔駛咁認真嘅！如果budget真係好緊、無得帶隊醫去比賽，可以帶個紙板隊醫隨隊，最少有個「人」在場邊支持運動員啦！港甲出現「世紀烏龍頭鎚」好似太明顯，唔怕，之後隊波嘅海報、硬照全部都可以擺頭鎚姿勢，明目張膽、同大家講明白頭鎚才是看家本領！不過薄荷糖最想的，就是曼聯可以來港找球衣贊助，無他嘅，偏向斬波，咁不如印住某家燒味廣告的球衣真係玩味甚濃：「講咩英文呀，扮晒嘢！斬多兩舊叉燒俾你邊食邊睇波，得唔得呀？」