卓韻芝胸襲黃宗澤硬晒

lwl2007

前DJ卓韻芝前晚在棟篤笑上向嘉賓黃宗澤（Bosco）施展鹹豬手，「胸」襲對方，流晒口水的阿芝不斷望住Bosco放電，更大講有味笑話。

卓韻芝（阿芝）前晚以香港首位女士身份在演藝學院舉行棟篤笑，全場600座位爆滿，一身黑衫打扮的阿芝先向觀眾鞠躬，接着以男同性戀者作話題，還擺DJ好友余迪偉上枱，引得全場捧腹大笑。她埋怨前男友MJ@Mr.「冇手尾」，她說：「用完啲嘢唔合埋個蓋，着完我啲裙就掟喺梳化，又將我啲Leggings剪成手襪。」

摸足成分鐘

阿芝邀得黃宗澤任表演嘉賓，她含情脈脈拖住對方圍繞舞台一周，隨即拉對方坐低「問話」，不停追問Bosco與女友胡杏兒的感情生活，期間將手慢慢搭在對方膊頭，全場Fans嘩然，最後索性開口問Bosco：「可唔可以畀我摸你個胸？」Bosco合作地拉開衫說：「伸入嚟啦！」猴擒的阿芝即伸手摸胸，並說：「唔夠膽郁。」最終摸足成分鐘，她說：「好硬呀！」

阿芝要求與Bosco用手機影合照，Bosco說：「近排講影相好尷尬。（係咪介意畀人影到赤裸？）嬲到想死。」提到當年阿芝做出自殺傻事，她說：「自殺前寫定遺書，醒番之後有好多朋友留言支持我。」

                                                                                                                                              
阿芝伸手入衫「胸」襲Bosco，還說：「好硬呀！」


                                                                                                              
阿芝賣力表演，觀眾睇得開心。


                                                                                                              
田蕊妮到場打氣，見到記者即舉「V」。